Një grua, shtetase e Maqedonisë së Veriut, është arrestuar nën dyshimin për mashtrim dhe legalizim të përmbajtjes së rreme, pas një hetimi lidhur me shitjen e kundërligjshme të dy pronave.

Sipas njoftimit policor, rasti ka ndodhur në Shtime, ndërsa hetimet janë zhvilluar nga zyrtarët e Drejtorisë për Hetimin e Krimeve Ekonomike dhe Korrupsionit, përkatësisht Sektorit për Hetime Financiare.

E dyshuara dyshohet se kishte falsifikuar një autorizim te një noter në Maqedoninë e Veriut, përmes të cilit më pas kishte arritur t’i shiste në mënyrë të kundërligjshme dy prona të xhaxhait të saj.

Pas intervistimit, me urdhër të prokurorit, e dyshuara është dërguar në mbajtje.

Rasti mbetet nën hetime. /Telegrafi/