Një 50-vjeçar, i cili kërkohej nga Policia pas denoncimit për kërcënime ndaj ish-kunatës së tij në Skenderaj, është paraqitur në stacionin policor dhe ka përfunduar në ndalim për 48 orë. Rasti lidhet me një konflikt për kontaktet me fëmijët, gjatë të cilit i dyshuari kishte dërguar mesazhe kërcënuese përmes Instagramit, mëson Gazeta Sinjali.
Sipas informacioneve që ka siguruar Sinjali, i dyshuari është A.S. (50), ndërsa denoncimin e kishte bërë ish-kunata e tij, A.H.M. (24).
Gjithçka kishte nisur më 7 nëntor, kur 24-vjeçarja kishte raportuar se ish-bashkëshorti i motrës së saj i kishte dërguar një mesazh në Instagram, duke kërkuar që ish-gruaja të mos ia pengonte komunikimin me fëmijët.
Në mesazhin e denoncuar, i dyshuari kishte përdorur shprehjen “Do të bëhet gjaku deri në fyt”, duke paralajmëruar pasoja nëse situata nuk ndryshonte.
Pas denoncimit, Policia kishte intervistuar ankuesen dhe prindërit e saj, ndërsa 50-vjeçari ishte kërkuar në dy lokacione, por nuk ishte gjetur. Edhe përpjekjet e para për ta kontaktuar në telefon kishin qenë të pasuksesshme.
Megjithatë, të mërkurën, më 11 nëntor, hetuesit kanë arritur të kontaktojnë me të dyshuarin përmes telefonit dhe i kanë kërkuar të paraqitet në Stacionin Policor në Skenderaj.
Rreth orës 12:40, ai është paraqitur vullnetarisht në stacion, ku është intervistuar lidhur me kërcënimet e denoncuara.
Pas intervistimit, hetuesit kanë kontaktuar Prokurorinë, e cila ka urdhëruar ndalimin e tij për 48 orë.
Rasti vazhdon të hetohet për veprën penale “Kanosje”.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali
