Detaje të reja kanë dalë në dritë për të shtënat me armë zjarri që tronditën mëngjesin e sotëm fshatin Strellc i Epërm të Deçanit. Sinjali mëson se katër persona kanë deklaruar se është shtënë në drejtim të tyre, ndërsa në vendin e ngjarjes janë gjetur dy predha dhe një veturë e dëmtuar në pjesën e përparme. Policia tashmë ka arrestuar dy persona, ka shoqëruar një të tretë dhe ka gjetur një armë zjarri.
Sipas informacioneve ekskluzive që ka siguruar Sinjali, incidenti ka ndodhur sot, më 22 tetor 2026, rreth orës 05:00, në Strellc të Epërm.
Katër persona kanë raportuar se një person kishte qëlluar me armë në drejtim të tyre, duke nxitur ndërhyrjen e menjëhershme të Policisë.
Por ajo që i jep një dimension tjetër këtij rasti janë gjurmët e gjetura në vendin e ngjarjes.
Burimet e Sinjalit bëjnë me dije se gjatë ekzaminimeve fillestare janë gjetur dy predha, ndërsa është evidentuar edhe një veturë me dëmtime në pjesën e parafangos.
Ende nuk është përcaktuar nëse dëmtimi i veturës është shkaktuar nga të shtënat, ndërsa kjo pritet të jetë një nga çështjet që do të sqarohen gjatë hetimeve.
Ndërkohë, pas veprimeve të para policore, dy persona nga Strellci i Epërm janë arrestuar, ndërsa një tjetër është shoqëruar për procedura të mëtejshme.
Gjatë këtyre veprimeve është gjetur edhe një armë zjarri, për të cilën njëri prej personave ka pranuar posedimin.
Megjithatë, ende nuk është konfirmuar nëse pikërisht kjo armë është përdorur në incidentin e raportuar nga katër personat.
Burimet e Sinjalit bëjnë me dije se të katër raportuesit janë intervistuar, ndërsa vendi i ngjarjes është siguruar për ekzaminime të mëtejshme.
Në trajtimin e rastit janë përfshirë hetuesit policorë të Deçanit, ndërsa është kërkuar edhe angazhimi i hetuesve rajonalë për zbardhjen e plotë të ngjarjes.
Pyetjet kryesore mbeten se kush ka shtënë, përse është qëlluar në drejtim të katër personave dhe nëse vetura e dëmtuar ka qenë objektiv i të shtënave.
Sinjali do të sjellë detaje të tjera për këtë rast sapo të sigurohen informacione të reja mbi personat e përfshirë dhe rrethanat e incidentit.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
Burimi: Sinjali
