Bashkia në Valais do të ndërtojë dy vende përkujtimore pranë barit “Le Constellation”, ku humbën jetën 41 persona dhe u plagosën 115 të tjerë. Në natën e Vitit të Ri, në Liqenin Grenon do të realizohet edhe një instalacion ndriçues në shenjë nderimi për viktimat.

Crans-Montana po përgatitet të përkujtojë viktimat e zjarrit tragjik që tronditi resortin zviceran, duke planifikuar dy memoriale të përkohshme në afërsi të vendit të katastrofës, shkruan Watson.

Sipas planit të publikuar nga bashkia, memoriali i parë do të vendoset në fasadën e barit të djegur “Le Constellation”, e cila do të mbulohet për të mbrojtur vendin e tragjedisë dhe për t’i dhënë atij një pamje të thjeshtë e dinjitoze.

Familjarët e viktimave do të kenë mundësinë që emrat e të dashurve të tyre t’i gdhendin në këtë hapësirë përkujtimore.

Memoriali i dytë parashihet të ndërtohet pranë kishës Saint-Christophe, pak më larg vendit të zjarrit. Kjo hapësirë do të shërbejë si vend reflektimi, ku familjarët dhe vizitorët mund të lënë sende personale dhe kujtime në nderim të viktimave.

Të dy projektet janë bërë publike për shqyrtim, ndërsa autoritetet lokale synojnë që punimet të nisin sa më shpejt. Memorialet do të jenë të përkohshme, deri në realizimin e një përmendoreje të përhershme, transmeton Telegrafi.

Ceremonia përkujtimore më 1 janar

Ceremonia zyrtare përkujtimore do të mbahet më 1 janar, në orën 10:00, në Grône të kantonit Valais.

Për t’u mundësuar edhe banorëve të Crans-Montanës të marrin pjesë, ceremonia do të transmetohet drejtpërdrejt në Qendrën e Kongreseve “Le Régent”, në resortin turistik.

Ndërkohë, në Liqenin Grenon, në një distancë të shkurtër nga vendi i tragjedisë, do të realizohet një instalacion i veçantë me efekte ndriçimi në formë ylli, i menduar si hapësirë për reflektim të qetë.

Bashkia ka vendosur që instalacioni të mos shoqërohet me muzikë apo efekte zanore, duke ruajtur karakterin solemn të përkujtimit.

Instalacioni do të jetë i dukshëm gjatë netëve të 31 dhjetorit dhe 1 janarit, nga ora 21:00 deri në orën 02:00.

Zjarri në “Le Constellation” la pas 41 viktima dhe 115 persona të plagosur, duke shkaktuar tronditje të thellë në komunitetin lokal dhe më gjerë. Përmes këtyre hapësirave përkujtimore, Crans-Montana synon të nderojë të ndjerët dhe të krijojë vende ku familjarët dhe publiku mund të kujtojnë viktimat e tragjedisë./Telegrafi/