Sekretari amerikan i Shtetit, Marco Rubio, e kishte informuar presidentin Donald Trump për dyshimet se drejtori ekzekutiv i kompanisë Nvidia, Jensen Huang, kishte një lidhje jashtëmartesore me një grua që inteligjenca amerikane e konsideron spiune kineze, gjatë udhëtimit të presidentit amerikan në Kinë në maj. Kështu ka raportuar CNN-i, duke cituar një burim në dijeni të çështjes.
Sipas burimit, kjo çështje ishte diskutuar në bordin presidencial Air Force One, përpara se Huang t’i bashkohej Trumpit dhe zyrtarëve të lartë amerikanë në pjesën e fundit të udhëtimit drejt Pekinit, pas një ndalese në Alaskë.
Megjithatë, Trumpi ka mohuar të hënën se kishte pasur dijeni për këto dyshime gjatë udhëtimit. Ai ka deklaruar se kishte mësuar për rastin vetëm së fundmi dhe se FBI-ja po e hetonte çështjen.
Presidenti amerikan i ka minimizuar zbulimet për lidhjen e Huangut me Alice Huang, drejtuese në një kompani teknologjike me seli në Singapor, për të cilën inteligjenca amerikane ka arritur në përfundimin se është spiune kineze. Dy personat nuk kanë lidhje familjare.
“Unë vërtet i besoj”, ka thënë Trumpi për drejtorin e Nvidia-s, duke shtuar se besonte pretendimin e tij se nuk kishte pasur dijeni për operacionin e dyshuar të spiunazhit.
Sipas raportimit të CNN-it, dyshimet për Alice Huang ishin ngritur nga FBI-ja rreth një vit më parë. Agjentët kishin paralajmëruar ligjvënësit se Jensen Huang mund të ishte objektiv i një operacioni të inteligjencës së huaj, për shkak të marrëdhënies së afërt me të. Hetuesit kishin vërejtur gjithashtu se Alice Huang kishte fituar papritur një fuqi të pazakontë blerëse për dikë në pozitën e saj.
Në maj, një memorandum i klasifikuar, i mbikëqyrur nga sekretari i Shtetit, Marco Rubio, paralajmëronte për lidhjen e drejtorit të Nvidia-s me gruan që SHBA-ja tashmë e konsideron spiune kineze. Dokumenti iu shpërnda një grupi të kufizuar zyrtarësh të lartë amerikanë përpara vizitës së Trumpit në Kinë.
Sipas burimit të CNN-it, presidenti ishte informuar për shqetësimet gjatë udhëtimit, por nuk ndërmori ndonjë veprim të dukshëm për t’u distancuar nga Huang. Përkundrazi, ai këmbënguli që drejtori i Nvidia-s t’i bashkohej delegacionit amerikan.
Rasti ka ngritur shqetësime për sigurinë kombëtare dhe ekonomike të SHBA-së, veçanërisht për mundësinë që Pekini të ketë siguruar informacione të ndjeshme lidhur me industrinë amerikane të inteligjencës artificiale dhe teknologjinë e avancuar të gjysmëpërçuesve.
Të hënën, zyrtarë të lartë të administratës Trump janë takuar me të ashtuquajturin “Grupi i Tetëshes”, i përbërë nga ligjvënës përgjegjës për mbikëqyrjen e agjencive amerikane të inteligjencës. Në këtë takim janë diskutuar informacionet për lidhjen e Huangut dhe dyshimet për spiunazh.
Demokratët kanë paralajmëruar se do të nisin hetime të shumta pasi të marrin kontrollin e Kongresit në janar. Ata kërkojnë të sqarojnë se çfarë dinte administrata dhe nëse vendimet për eksportin e çipave të avancuar drejt Kinës mund të jenë ndikuar ose komprometuar.
“Eksporti i gjysmëpërçuesve të avancuar në Kinë ose në vende ku ajo mund të ketë qasje në to është çështje me rëndësi të jashtëzakonshme për sigurinë kombëtare”, ka thënë Jim Himes, demokrati më i lartë në Komitetin e Inteligjencës të Dhomës së Përfaqësuesve.
Edhe republikanët kanë kërkuar sqarime nga Nvidia. Tre ligjvënës republikanë i kanë kërkuar Huangut të marrë pjesë në një seancë informuese konfidenciale gjatë këtij muaji.
Huang, i cili bashkëthemeloi Nvidia-n dhe e shndërroi atë në një nga kompanitë më të vlefshme në botë, ka pasur ndikim të madh në politikat e administratës Trump për inteligjencën artificiale. Ai ka kërkuar vazhdimisht lehtësimin e kufizimeve për shitjen e çipave të avancuar amerikanë në Kinë.
Ndërkohë, Nvidia ka njoftuar se do të zhvillojë hetimin e vet për sjelljen e drejtorit ekzekutiv, por ende nuk dihet nëse bordi i kompanisë do ta shqyrtojë mundësinë e shkarkimit të tij.
Një vendim i tillë do të kishte pasoja të mëdha për kompaninë, pasi Huang konsiderohet figurë kyçe në Nvidia, e cila furnizon çipat kryesorë në qendër të bumit global të inteligjencës artificiale.
Sinjali – aty ku e vërteta flet para lajmit!
Burimi: Sinjali
