Një 64-vjeçar nga Kosova është arrestuar në qytetin Winnenden të Gjermanisë, nën dyshimin se ka ngacmuar seksualisht dy gra në një dyqan veshjesh.
Sipas njoftimit të Policisë në rajonin Rems-Murr, rasti i parë ka ndodhur të enjten në mbrëmje, mes orës 18:15 dhe 18:35, në një dyqan në rrugën Wallstraße.
Një grua ka raportuar se ishte prekur në mënyrë të papërshtatshme nga një burrë, identiteti i të cilit fillimisht nuk dihej.
Pak më vonë, i dyshuari është larguar nga dyqani, ndërsa gruaja e ka ndjekur dhe ka vërejtur se ai po prekte në të pasmet edhe një grua tjetër.
Pas njoftimit të policisë nga viktima, zyrtarët policorë kanë arritur ta lokalizojnë dhe arrestojnë 64-vjeçarin në rrugën Paulinenstraße.
Policia ka nisur hetimet për rastin dhe është në kërkim të gruas së dytë, identiteti i së cilës ende nuk dihet.
Po ashtu, autoritetet gjermane u kanë bërë thirrje dëshmitarëve dhe personave të tjerë që mund të jenë ngacmuar nga i dyshuari që të paraqiten dhe të japin informacione për rastin.
Sinjali – aty ku e vërteta flet para lajmit!
Burimi: Sinjali
