Juventusi ka sulmin e dytë më të dobët në mesin e dhjetë skuadrave të para në Serie A, ndërsa renditet në vendin e 18-të për golat e pritur nga aksionet e lojës së hapur, pas nëntë xhirove të para të sezonit.

Juventusi pësoi të mërkurën humbjen e dytë në tri ndeshjet e fundit në Serie A, duke u mposhtur 2-0 në udhëtim nga Genoa.

Statistikat e “Zonjës së Vjetër” janë shqetësuese në disa aspekte të lojës, nga sulmi deri te mbrojtja. Megjithatë, emisioni pas ndeshjes i Sky Sport Italia u përqendrua te shifrat e skuadrës bardhezi në fazën e fundit të sulmit.

Juventusi renditet në vendin e 16-të në Serie A për golat e pritur në total (0.93), ndërsa zë vendin e 18-të për golat e pritur nga aksionet e lojës së hapur (0.64) dhe për goditjet brenda zonës së rreptësisë (5.84).

I vetmi tregues pozitiv për skuadrën torineze lidhet me goditjet nga jashtë zonës. Me një mesatare prej 4.75 goditjesh për ndeshje, Juventusi renditet i katërti në këtë kategori në kampionat.

Për më tepër, gjiganti italian ka shënuar vetëm 11 gola në nëntë ndeshjet e para të sezonit në Serie A. Në mesin e dhjetë skuadrave të para në tabelë, vetëm Cagliari ka shënuar më pak, gjithsej tetë gola.

Ndeshjen e radhës në Serie A, Juventusi do ta zhvillojë të dielën në shtëpi ndaj Napolit, në stadiumin ‘Allianz’ të Torinos./Telegrafi/