Qeveria federale e Zvicrës ka shtuar në listën e substancave të ndaluara disa droga të reja sintetike, përfshirë substanca që imitojnë efektet e kanabisit dhe qetësuesve të fortë. Vendimi synon të parandalojë përhapjen e këtyre drogave dhe tregtimin e tyre përmes ndryshimeve të vogla në përbërjen kimike.

Ndryshimet në Urdhëresën për Narkotikët të Departamentit Federal të Punëve të Brendshme (EDI) u miratuan të martën. Ato pasqyrojnë zhvillimin e tregut të substancave psikoaktive sintetike, përbërja kimike dhe efektet shëndetësore të të cilave, në disa raste, ende nuk janë kuptuar plotësisht, shkruan Watson.

Siç bëhet e ditur në njoftimin e EDI-së, kontrolli i narkotikëve nuk kufizohet më vetëm te substancat tradicionale si kanabisi, kokaina dhe heroina, por po përshtatet gjithnjë e më shumë me shfaqjen e drogave të reja të prodhuara artificialisht.

Lista e re përfshin jo vetëm substanca të veçanta, por edhe grupe të tëra përbërjesh kimike. Me këtë masë, autoritetet synojnë të pengojnë prodhuesit që të ndryshojnë minimalisht strukturën kimike të një substance të ndaluar dhe më pas ta tregtojnë atë me një emër të ri, transmeton Telegrafi.

EDI: Synojmë të parandalojmë përhapjen e drogave të reja

Në njoftimin e Departamentit Federal të Punëve të Brendshme thuhet se zgjerimi i listës do të mundësojë kontrollin më të hershëm të substancave të reja psikoaktive.

“ Kjo do të lejojë që substancat e reja psikoaktive të vihen nën kontroll në një fazë të hershme dhe përhapja e tyre të frenohet. Në të njëjtën kohë, kjo duhet të parandalojë që Zvicra të bëhet një qendër për tregtinë e drogave të dizajnuara”, thuhet në njoftim.

Të gjitha substancat e shtuara në listë i nënshtrohen Ligjit për Narkotikët. Për rrjedhojë, prodhimi, tregtia dhe përdorimi i tyre janë të paligjshme.

Disa substanca mund të shkaktojnë komplikime serioze

Sipas EDI-së, tri nga substancat e ndaluara rishtazi kanë efekte të ngjashme me kanabisin. Ato përdoren, ndër të tjera, në lëngjet e cigareve elektronike.

Megjithatë, efektet e tyre mund të jenë dukshëm më të forta se ato të THC-së që gjendet natyrshëm në kanabis, duke rritur rrezikun e komplikimeve serioze shëndetësore.

Dy substancat e tjera veprojnë si qetësues të fortë. Kombinimi i tyre me substanca të tjera mund të shkaktojë helmim të rrezikshëm./Telegrafi/