Tregjet amerikane kanë përjetuar një nga ditët më të rënda të fundit, pasi Wall Street-i humbi plot 3.2 trilionë dollarë në vlerë gjatë së enjtes, në një rënie të nxitur kryesisht nga tërheqja e investitorëve nga aksionet e teknologjisë dhe kompanitë e lidhura me inteligjencën artificiale.
Shitjet masive të aksioneve fshinë një pjesë të konsiderueshme të fitimeve të regjistruara pas zgjedhjeve të mesmandatit në SHBA, ndërsa shqetësimet për ngadalësimin e investimeve në zgjerimin e qendrave të të dhënave shtuan pasigurinë në tregje.
Indeksi Industrial Dow Jones ra me 3.44%, duke u ndalur në 51,521.28 pikë. Ndërkohë, S&P 500 shënoi rënie prej 4.3%, duke zbritur në 7,353.80 pikë, kurse Nasdaq pësoi humbjen më të madhe, me 5.52%, duke arritur në 24,315 pikë.
Në qendër të presionit ishin kompanitë e teknologjisë dhe ato të përfshira në zhvillimin e inteligjencës artificiale, aksionet e të cilave ranë për të dytën ditë radhazi.
Investitorët po shfaqin pasiguri në rritje lidhur me ritmin e investimeve në infrastrukturën e inteligjencës artificiale, veçanërisht në ndërtimin dhe zgjerimin e qendrave të të dhënave.
Presionit në tregje i është shtuar edhe pasiguria politike në SHBA. Shqetësimet se një fitore e thellë e demokratëve mund të sjellë pengesa ose ngadalësim të projekteve për zgjerimin e qendrave të të dhënave kanë ndikuar negativisht në besimin e investitorëve ndaj këtij sektori.
Sinjali – aty ku e vërteta flet para lajmit!
Burimi: Sinjali
