Një 61-vjeçar me origjinë shqiptare ka humbur jetën të mërkurën në mëngjes, si pasojë e një aksidenti në vendin e punës në Casarano, në provincën e Lecces, në Itali.

Viktima është identifikuar si Bashkim Rushani, pronar i një kompanie ndërtimi, i cili dyshohet se mbeti i bllokuar nën një portë rrëshqitëse që u rrëzua mbi të.

Sipas raportimit të mediumit italian “Tgcom24”, ekipet e emergjencës kanë arritur në vendin e ngjarjes, por nuk kanë mundur ta shpëtojnë 61-vjeçarin. Ata vetëm kanë konstatuar vdekjen e tij.

Në vendin e ngjarjes kanë dalë edhe karabinierët dhe inspektorët e SPESAL-it, organ që merret me mbikëqyrjen dhe sigurinë në vendet e punës.

Rrethanat e plota të aksidentit dhe mënyra se si porta rrëshqitëse ra mbi viktimën pritet të sqarohen nga hetimet.

Burimi: Sinjali