Një ngjarje e rëndë ka ndodhur gjatë operacionit për shuarjen e një zjarri në një ndërtesë të braktisur në Zefiri, në bashkinë e Filit, Greqi, mesditën e së shtunës.

Dy zjarrfikës, përkatësisht 23 dhe 44 vjeç, kanë humbur jetën pasi një pjesë e ndërtesës ku po ndërhynin u shemb.

Nga incidenti mbeti i plagosur edhe një tjetër zjarrfikës.

Autoritetet po hetojnë nëse dy efektivët humbën jetën nga asfiksia, për shkak të tymit dhe kushteve brenda ndërtesës që ishte përfshirë nga flakët, apo nëse u zunë poshtë nga materialet ndërtimore që u shembën.

Zjarri shpërtheu në një ndërtesë të braktisur në rrugën “Katsantoni”, në bashkinë e Filit.

Gjatë operacionit për shuarjen e zjarrit, ndërsa zjarrfikësit po ndërhynin brenda ndërtesës së braktisur, një pjesë e saj u shemb, duke shkaktuar alarm për nxjerrjen e efektivëve të bllokuar.

Njëri prej zjarrfikësve u nxor fillimisht pa shenja jete dhe u mor nga një ambulancë e Shërbimit Kombëtar të Urgjencës (EKAB), për t’u transportuar në Spitalin Attikon.

Një tjetër u nxor i lënduar, ndërsa informacionet e para bënin të ditur se po kërkohej edhe një zjarrfikës i tretë.

Informacionet e fundit konfirmojnë vdekjen e dy zjarrfikësve dhe lëndimin e një tjetri.

Shkaqet e zjarrit, si dhe rrethanat që çuan në shembjen e një pjese të ndërtesës, vijojnë të jenë nën hetim. /Telegrafi/