Një ngjarje e rëndë ka tronditur komunitetin shqiptar në Itali, ku një 21-vjeçar dyshohet se ka vrarë me thikë nënën e tij 39-vjeçare në banesën ku jetonin së bashku, në qytetin Chiari, në provincën e Breshias.
Sipas raportimit të gazetës italiane “Corriere della Sera”, viktima është M.L., ndërsa djali i saj është E.XH. Familja është me origjinë shqiptare.
Ngjarja ka ndodhur gjatë natës mes 2 dhe 3 nëntorit, në banesën familjare në rrugën Via Tagliata. Pas krimit, 21-vjeçari është larguar nga banesa, për t’u paraqitur më pas vetë në stacionin e Karabinierëve në Kremona.
Sipas raportimeve të mediave italiane, i riu ka pranuar se e ka vrarë nënën e tij. Ndërkohë, autoritetet kanë nisur hetimet për të zbardhur rrethanat e plota të ngjarjes dhe për të përcaktuar motivin, i cili ende nuk është bërë i ditur.
Nëna e kishte rritur e vetme, mbështetej nga vëllezërit
Meleqe Lusha dhe djali i saj jetonin vetëm në të njëjtën banesë. Ata ishin vendosur në apartamentin e tyre të ri në muajin gusht, ndërsa prej kohësh jetonin në qytetin Chiari.
Sipas raportimeve, 39-vjeçarja e kishte rritur të birin e vetme, me mbështetjen e vëllezërve të saj, të cilët i kishin qëndruar pranë familjes. Katër vëllezërit e viktimës kanë mbërritur në banesë pas ngjarjes.
21-vjeçari kishte studiuar në Chiari dhe punonte në një fabrikë
E.XH. kishte jetuar në Chiari që nga fëmijëria dhe kishte ndjekur mësimet në institutin Einaudi. Ai kishte përfunduar edhe një periudhë praktike në një agjenci imobiliare të drejtuar nga Dennis Beqiri, kryetar i shoqatës së shqiptarëve në Chiari.
Sipas raportimeve të mediave lokale, i riu punonte si punëtor në një fabrikë të zonës.
Beqiri, duke folur për mediat italiane, ka shprehur tronditjen e komunitetit shqiptar, duke e përshkruar 21-vjeçarin si një të ri të sjellshëm, serioz dhe të respektuar.
Ai ka thënë se edhe nëna e tij ishte një person shumë i mirë dhe se e kishte rritur të birin e vetme, me ndihmën e vazhdueshme të vëllezërve të saj.
“Jemi të tronditur. Nuk i dimë arsyet e këtij veprimi dhe nuk arrijmë ta kuptojmë”, është shprehur Beqiri, sipas raportimit të mediave italiane.
Edhe kryetari i qytetit Chiari, Gabriele Zotti, e ka cilësuar ngjarjen si një rast të pakuptueshëm, duke shprehur solidaritetin me familjen e viktimës.
Ndërkohë, komuniteti shqiptar në këtë qytet është tronditur nga tragjedia, ndërsa hetimet e autoriteteve italiane po vazhdojnë për të zbardhur motivin dhe të gjitha rrethanat e vrasjes.
Sinjali – aty ku e vërteta flet para lajmit!
Burimi: Sinjali
