Kryeministri polak, Donald Tusk, iu drejtua qytetarëve me një fjalim televiziv, pas përshkallëzimit të konfliktit institucional për Gjykatën Kushtetuese, duke deklaruar se sundimi i ligjit do të triumfojë mbi dhunën.

Tensionet u rritën të premten, kur presidenti Karol Nawrocki tentoi të hynte me forcë në godinën e Gjykatës Kushtetuese, në mes të mosmarrëveshjeve për emërimin e gjyqtarëve të rinj.

Policia rrethoi ndërtesën, ndërsa incidenti u transmetua drejtpërdrejt në televizion.

Tusk akuzoi partinë opozitare Ligj dhe Drejtësi (PiS) dhe presidentin për bllokimin e reformave në drejtësi.

Ai mbrojti ligjshmërinë e emërimit të gjyqtarëve të rinj, të cilët kanë kryer betimin, por ende nuk janë lejuar të ushtrojnë detyrën.

“Një shtet demokratik duhet të jetë i fortë dhe i aftë të vendosë drejtësinë”, deklaroi kryeministri.

Ndërkohë, opozita e akuzon qeverinë për përpjekje për grusht shteti, ndërsa Tusk paralajmëroi se grupet pro-ruse mund të shfrytëzojnë përçarjet politike në vend.

Në përfundim, ai u zotua se qeveria do të garantojë sigurinë dhe kushtet e nevojshme për funksionimin e Gjykatës Kushtetuese, por nuk paraqiti një marrëveshje konkrete për zgjidhjen e krizës. /Telegrafi/