Regjisori i njohur Michael Mann është plagosur aksidentalisht me armë zjarri në një poligon qitjeje dhe më pas është transportuar në spital. 83-vjeçari aktualisht është duke punuar në fazën e parapërgatitjeve për vazhdimin e filmit të tij të njohur, “Heat”.

Sipas raportimit të portalit TMZ, incidenti ka ndodhur teksa Mann po përpiqej ta vendoste armën në këllëf.

Policia e Los Angelesit (LAPD) e ka konfirmuar rastin për TMZ, duke bërë të ditur se zyrtarët e saj kanë dalë në vendin e ngjarjes, në poligonin e qitjes “The Range LA”.

Në raportin policor theksohet se plagosja nuk ka qenë e qëllimshme. Sipas të dhënave, Mann është lënduar gjatë një aksidenti në poligon, kur arma e zjarrit është shkrepur aksidentalisht dhe e ka goditur në këmbë.

Karriera e Michael Mann në Hollywood shtrihet në disa dekada, gjatë të cilave ai ka realizuar një sërë filmash të njohur.

Ndër veprat më të spikatura të tij janë “Thief” (1981), “Manhunter” (1986), “The Last of the Mohicans” (1992), “Heat” (1995), “The Insider” (1999), “Ali” (2001), “Collateral” (2004), “Miami Vice” (2006), “Public Enemies” (2009) dhe “Ferrari” (2023). /Telegrafi/