Policia e Kosovës u ka bërë thirrje qytetarëve të tregojnë kujdes gjatë shitjes së produkteve në platformat online, pasi kohëve të fundit janë evidentuar raste të mashtrimeve përmes linqeve të dyshimta, me të cilat synohet marrja e të dhënave të kartelave bankare.

Sipas Policisë, persona të dyshuar kontaktojnë qytetarët që kanë publikuar produkte për shitje, paraqiten si blerës të interesuar dhe u dërgojnë linqe mashtruese, përmes të cilave kërkojnë të dhënat bankare, kinse për realizimin e pagesës.

Policia u rekomandon qytetarëve të mos hapin linqe të dyshimta dhe të mos japin të dhënat e kartelave bankare, përfshirë numrin e kartelës, datën e skadimit, kodin CVV/CVC dhe kodet e konfirmimit bankar.

Po ashtu, kërkesat për pagesa duhet të verifikohen vetëm përmes kanaleve zyrtare të bankave ose platformave përkatëse.

“Nëse keni dhënë të dhënat bankare në ndonjë faqe të dyshimtë, kontaktoni menjëherë bankën për bllokimin e kartelës dhe rastin raportojeni në Policinë e Kosovës”, thuhet në njoftim.

“Për të shitur online, nuk keni nevojë të zbuloni të dhënat e kartelës suaj bankare!”, thekson Policia e Kosovës.

Burimi: RTKLive