Disa ilaçe që përdoren për trajtimin e sëmundjeve të ndryshme mund të kenë ndikim negativ në shëndetin e kockave, duke shkaktuar ulje të dendësisë së tyre dhe duke rritur rrezikun për fraktura.
Sipas një artikulli të publikuar nga “The Washington Post”, pesë kategori barnash kërkojnë vëmendje të veçantë për shkak të ndikimit të mundshëm në strukturën dhe qëndrueshmërinë e kockave.
Në mesin e tyre janë kortikosteroidet orale, si prednizoni, që përdoren për trajtimin e inflamacionit, alergjive, astmës dhe sëmundjeve autoimune. Përdorimi i tyre për periudha të gjata dhe në doza të larta mund të pengojë formimin e kockave dhe të përshpejtojë humbjen e masës kockore.
Një tjetër kategori janë frenuesit e aromatazës, të përdorur në trajtimin e kancerit të gjirit. Këto barna ulin nivelin e estrogjenit, hormon që ndihmon në ruajtjen e dendësisë së kockave, duke rritur kështu rrezikun për dobësimin e tyre.
Edhe disa ilaçe kundër epilepsisë, veçanërisht fenobarbitali, fenitoina dhe karbamazepina, mund të ndikojnë në shëndetin e kockave. Ato mund të ulin nivelin e vitaminës D, duke vështirësuar përthithjen e kalciumit nga organizmi.
Në listë përfshihet edhe terapia e privimit nga androgjenet (ADT), e përdorur për trajtimin e kancerit të prostatës. Kjo terapi ul nivelin e testosteronit, hormon që ndihmon në ruajtjen e forcës së kockave dhe masës muskulore.
Kategoria e pestë janë antidepresivët e njohur si frenues selektivë të rimarrjes së serotoninës (SSRI), të cilët përdoren për trajtimin e depresionit dhe ankthit. Disa studime i kanë lidhur këto barna me uljen e mundshme të dendësisë së kockave dhe rritjen e rrezikut për fraktura, megjithëse nevojiten më shumë hulumtime.
Ekspertët e cituar nga “The Washington Post” theksojnë se përdorimi i këtyre barnave nuk nënkupton domosdoshmërisht se duhet të ndërpritet trajtimi.
Personat që i përdorin këto ilaçe këshillohen të diskutojnë me mjekun për rrezikun e mundshëm, kontrollet e dendësisë së kockave dhe nevojën për monitorimin e nivelit të kalciumit dhe vitaminës D.
Gjithashtu, aktiviteti fizik që përfshin mbajtjen e peshës së trupit dhe ushtrimet e rezistencës mund të ndihmojnë në ruajtjen e shëndetit të kockave dhe muskujve.
Ekspertët paralajmërojnë që asnjë ilaç të mos ndërpritet pa u konsultuar paraprakisht me mjekun që e ka përshkruar.
Sinjali – aty ku e vërteta flet para lajmit!
Burimi: Sinjali
