Pas një ndërprerjeje globale që zgjati të paktën 18 orë dhe la miliona përdorues pa qasje në shërbimet e saj digjitale, Microsoft ka njoftuar se ka shënuar përparim në rikthimin e funksionimit të platformave të prekura. Megjithatë, kompania paralajmëron se disa përdorues mund të vazhdojnë të përballen me probleme deri në stabilizimin e plotë të infrastrukturës.
Në përditësimin e fundit, gjiganti amerikan i teknologjisë bëri të ditur se situata në Evropë është duke u përmirësuar, ndërsa disponueshmëria e shërbimeve po rritet gradualisht. Edhe shpërndarja e email-eve është rikthyer në një pjesë gjithnjë e më të madhe të infrastrukturës.
Sipas Microsoftit, Japonia vazhdon të ketë një situatë relativisht të qëndrueshme, ndërsa përmirësime janë regjistruar edhe në Amerikën e Veriut.
“Japonia mbetet relativisht më e qëndrueshme, ndërsa situata në Amerikën e Veriut po përmirësohet gjithashtu. Megjithatë, disa klientë mund të përjetojnë ende ndërprerje në aksesin në shërbime ndërsa vazhdojnë veprimet e rimëkëmbjes”, deklaroi kompania, raporton BBC.
Ndërprerja preku disa prej platformave më të përdorura të Microsoftit, përfshirë shërbimin e postës elektronike Outlook, platformën e komunikimit dhe videokonferencave Teams, si dhe mjete të tjera të Microsoft 365, të cilat përdoren çdo ditë nga biznese, institucione arsimore dhe organizata të ndryshme.
Pasojat më të mëdha u raportuan në Shtetet e Bashkuara dhe Australi, por problemet u shtrinë edhe në pjesë të tjera të botës, duke penguar funksionimin normal të shumë institucioneve dhe kompanive, raporton CNN.
Në SHBA, disa punonjës u detyruan të përfundonin më herët orarin e punës, pasi nuk mund të përdornin sistemet e brendshme të kompanive. Ndërsa në Australi, bizneset raportuan vështirësi në printimin e faturave dhe disa shkolla nuk arritën të zhvillonin mësimet e planifikuara online.
Ndërprerjet patën pasoja edhe në sektorë të tjerë. Mediat australiane raportuan probleme me transmetimet e drejtpërdrejta nga gjykatat, pengesa në zhvillimin e intervistave të punës përmes internetit, si dhe vështirësi në qendrat e shpërndarjes që furnizojnë supermarketet.
Microsoft kishte nisur më herët ndërhyrjet për stabilizimin e infrastrukturës së serverëve dhe rikthimin e platformave të prekura. Përpjekjet fillestare, përfshirë rinisjen e sistemeve problematike, sollën përmirësime, por nuk arritën të siguronin menjëherë një funksionim të qëndrueshëm.
Në një njoftim të mëvonshëm përmes llogarisë zyrtare të incidenteve të Microsoft 365 në rrjetin social X, kompania bëri të ditur se ende nuk kishte konfirmuar rikthimin e qëndrueshëm të të gjitha shërbimeve.
Ekipet teknike po vazhdojnë punën për eliminimin e problemeve të mbetura, ndërsa Microsoft u ka bërë të ditur përdoruesve se pengesat mund të vazhdojnë deri në përfundimin e plotë të procesit të rikuperimit.
Sinjali – aty ku e vërteta flet para lajmit!
Burimi: Sinjali
