Të enjten, të paktën 27 fluturime në mbarë Evropën – nga Irlanda e deri në Bullgari – u përballën me kërcënime të rreme për bomba.
Kjo është vala e dytë e këtij lloji brenda javës, duke detyruar disa aeroplanë të kryejnë ulje të paplanifikuara, ndërsa aeroplanë luftarakë u angazhuan për t’i shoqëruar ose për t’i ndaluar të tjerët.
Edhe pse asnjë shtet nuk ka marrë përsipër përgjegjësinë për këto kërcënime, ato vijnë në një kohë kur shumë zyrtarë evropianë akuzojnë Rusinë se qëndron pas akteve të sabotimit dhe “sulmeve hibride” – të cilat shpesh janë me kosto të ulët, lehtësisht të mohueshme dhe nuk pritet të shkaktojnë një përgjigje të armatosur.
Danimarka, Polonia dhe Rumania – të gjitha të prekura nga ndërprerjet e së enjtes – e kanë akuzuar më parë Moskën drejtpërdrejt, ndërsa Gjermania e fajësoi Rusinë për një sulm në aeroportin e Lajpcigut në muajin gusht.
Britania e Madhe e ka fajësuar Rusinë në të kaluarën, por gjithashtu e ka lidhur Iranin me një komplot të dyshuar për të sulmuar një bazë ajrore amerikane. Si Rusia, ashtu edhe Irani, mohojnë çdo përfshirje.
Eric Schouten, kreu i grupit të sigurisë së aviacionit “Dyami”, u shpreh se shumica e vendeve të prekura e mbështesin Ukrainën në luftën e saj kundër pushtimit rus.
“Nga një këndvështrim gjeopolitik, duhet pasur gjithmonë parasysh skenarin e luftës hibride, ku një shtet – në këtë rast po flasim për Rusinë, apo jo? – na sulmon në fronte të shumta: nga hekurudhat e supermarketet, e së fundmi deri te bankat e gjakut. Sektori i energjisë, interneti dhe aviacioni janë gjithashtu pjesë e këtyre shënjestrave”, citohet të ketë thënë ai.
Në Francë, zyra e ministrit të Mbrojtjes, Sébastien Lecornu, njoftoi se ishin dërguar aeroplanë luftarakë për të ndaluar një fluturim të kompanisë “Aer Lingus” nga Dublini për në Romë dhe për ta shoqëruar atë drejt një baze ajrore në Evreux, pasi piloti nuk bashkëpunoi me autoritetet sipas procedurave të pritshme.
Nuk u dha asnjë shpjegim për sjelljen e pilotit.
Forcat Ajrore të Bullgarisë njoftuan se aeroplanët e tyre luftarakë shoqëruan tre aeroplanë pasagjerësh deri në uljen e tyre në tokë.
Aeroplanët e kompanisë “Ryanair”, që vinin nga Kopenhaga dhe Madridi drejt Sofies, u ulën sipas planit, ndërsa një fluturim nga Londra për në Sofje u devijua drejt Plovdivit, qytetit të dytë më të madh të Bullgarisë.
Autoritetet spanjolle morën tre kërcënime me bombë me email në më pak se 20 minuta, që përfshinin dy nisje të Air Europa nga Madridi në Paris dhe katër fluturime hyrëse të Iberia nga Roma dhe Milano, tha Guardia Civil e Spanjës.
Disa aeroplanë në Madrid u ndaluan ose u kthyen në stacionet e tyre dhe pasagjerët zbritën ndërsa aeroplanët u inspektuan.
Në Varshavë, një fluturim LOT për në Paris u ndalua ndërsa po drejtohej drejt ngritjes dhe pasagjerët u transferuan në një aeroplan tjetër.
Një fluturim nga Cork në Irlandë u vonua 90 minuta pasi aeroporti mori një kërcënim, tha operatori i aeroportit.
Në aeroportin e Kopenhagenit në Danimarkë, dy aeroplanë u kontrolluan, tha policia.
Media italiane raportoi se një fluturim i Wizz Air nga Milano në Varshavë ishte devijuar për në Vjenë.
Dy fluturime të Easyjet nga Britania, një fluturim nga Irlanda dhe një nga Greqia u ulën sipas orarit në Pragë pasi u morën kërcënime për bomba; e njëjta gjë ndodhi edhe me një fluturim të Finnair nga Helsinki për në Vjenë, një fluturim të kompanisë polake LOT nga Varshava për në Bruksel, një fluturim të kompanisë hungareze Wizz Air (WIZZ.L) nga Milano për në Bukuresht, si dhe një fluturim të Air Serbia nga Beogradi, gjithashtu për në Bukuresht.
Agjencia italiane e lajmeve ANSA njoftoi se dy aeroplanë ishin ulur sipas planit në Milano, ndërsa një burim i njohur me situatën bëri të ditur se forcat ajrore italiane shoqëruan një aeroplan të Finnair, që vinte nga Helsinki, deri në uljen e tij të planifikuar në Romë. /Telegrafi/
