Prokuroria Themelore në Prizren ka ngritur aktakuzë ndaj tre personave për blerje, posedim, shpërndarje dhe shitje të paautorizuar të narkotikëve në bashkëkryerje. Sipas njoftimit për aktakuzën, të pandehurit figurojnë me inicialet R.B., A.R. dhe B.(Sh) B. dhe ndodhen në paraburgim që nga 23 marsi 2026.

Gazeta Sinjali kishte raportuar më 24 mars se në operacionin antidrogë “Kimisti” ishin arrestuar Refik Berisha, Agron Rexhepaj dhe Burim Shillova.
Operacioni u zhvillua më 23 mars në rajonin e Suharekës. Sipas raportimit të atëhershëm të Sinjalit, gjatë kontrollit të një furgoni u gjetën dy qese me rreth një kilogram substancë të dyshuar si heroinë, të fshehura në një hapësirë të improvizuar.
Prokuroria njoftoi pas aksionit se në total ishin sekuestruar rreth dy kilogramë heroinë, si dhe armë, municion, para dhe automjete.
Shënim: Personat e apostrofuar konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
/GazetaSinjali/
Burimi: Sinjali





