Tensionet në Gjirin Persik janë përshkallëzuar sërish, pasi Irani ka shënjestruar një bazë ajrore në Bahrein, në valën e fundit të sulmeve që kanë shkaktuar alarm në këtë shtet gjatë mëngjesit të së dielës.
Sipas mediave iraniane, Garda Revolucionare e Iranit (IRGC) ka deklaruar se ka dërguar gjashtë dronë drejt një sistemi radarësh amerikanë në Bahrein, aleat i Shteteve të Bashkuara të Amerikës.
Gjatë sulmit, sirenat e alarmit janë aktivizuar, ndërsa shpërthime janë dëgjuar në zonën përreth kryeqytetit Manama.
Megjithatë, autoritetet e Bahreinit kanë bërë të ditur se sistemet e mbrojtjes ajrore kanë arritur t’i interceptojnë sulmet përpara se dronët të godisnin objektivat e synuar.
Bahreini ka rëndësi të veçantë strategjike për SHBA-në, pasi aty ndodhet selia e Flotës së Pestë të Marinës amerikane. Shteti ishullor, i cili ndodhet përballë Iranit në anën tjetër të Gjirit Persik, është shënjestruar vazhdimisht nga Teherani gjatë konfliktit.
Sulmet e fundit kanë ngritur shqetësime për një rifillim të mundshëm të luftës, ndërsa presidenti amerikan, Donald Trump, ka kërcënuar me ndërhyrje të reja ushtarake, por deri më tani është përmbajtur nga rikthimi në operacione të mëdha.
Ndërkohë, negociatat për përfundimin e luftës kanë mbetur në ngërç. SHBA-ja po vazhdon bllokadën detare, ndërsa Irani mban nën kontroll të fortë Ngushticën e Hormuzit, një korridor jetik për transportin ndërkombëtar të naftës.
Sinjali – aty ku e vërteta flet para lajmit!
Burimi: Sinjali
