Lori Huang, bashkëshortja e drejtorit ekzekutiv të Nvidia-s, Jensen Huang, ka mbajtur një profil të ulët publik, pavarësisht ngritjes së jashtëzakonshme të kompanisë që sot renditet ndër më të vlefshmet në botë.
Interesimi për të është shtuar pas një mesazhi të Jensen Huang drejtuar punonjësve të kompanisë, të dielën, i cili e riktheu vëmendjen te gruaja me të cilën ai është i martuar prej më shumë se 40 vjetësh.
Historia e tyre e dashurisë nisi në universitet, ku Lori, atëkohë e njohur si Lori Mills, dhe Jensen u njohën si partnerë në një laborator gjatë studimeve për inxhinieri elektrike në Universitetin Shtetëror të Oregonit.
Në një intervistë të vitit 2024, Jensen tregoi se Lori ishte njëra prej vetëm tri vajzave në klasën e tij dhe ishte më e madhe në moshë se ai. Ai tha se arriti ta fitonte duke i propozuar të studionin së bashku çdo të diel, ndërsa i kishte premtuar se do të bëhej CEO para moshës 30-vjeçare.
Pesë vjet pas njohjes, ata u martuan dhe së bashku kanë dy fëmijë, Madison dhe Spencer, të cilët tashmë punojnë në Nvidia. Madison është drejtoreshë e lartë për marketingun e produkteve dhe atë teknik, ndërsa Spencer udhëheq një linjë produktesh në fushën e softuerëve për robotikë.
Përfshirja në Nvidia dhe filantropi
Lori Huang është presidente e Fondacionit Jen-Hsun dhe Lori Huang, organizatë filantropike që ajo dhe bashkëshorti i saj e themeluan në vitin 2007.
Sipas dokumenteve tatimore të dorëzuara në SHBA, fondacioni kishte raportuar asete neto prej 9.1 miliardë dollarësh në vitin 2024.
Çifti Huang ka dhuruar gjithashtu 50 milionë dollarë për Universitetin Shtetëror të Oregonit, për të ndihmuar në krijimin e një qendre kërkimore dhe inovacioni. Lori u diplomua në vitin 1985 me diplomë në inxhinieri elektrike.
Jensen Huang ka folur disa herë publikisht për ndikimin e bashkëshortes në jetën dhe karrierën e tij. Në një intervistë për mediat në Singapor, ai tha se Lori ka qenë pranë tij në çdo hap të rrugëtimit të Nvidia-s, duke marrë pjesë në konferenca, fjalime dhe momente të rëndësishme të kompanisë.
Ai madje e ka përmendur takimin me të si ngjarjen më të rëndësishme të jetës së tij gjatë kohës në universitet.
Sinjali – aty ku e vërteta flet para lajmit!
Burimi: Sinjali
