Një aksion i Antidrogës në Gjakovë ka përfunduar me arrestimin e një 35-vjeçari, pasi gjatë bastisjes së shtëpisë së tij janë zbuluar disa lloje substancash të dyshuara narkotike, peshore digjitale dhe para të gatshme. I dyshuari është ndaluar për 48 orë, ndërsa hetimet po zhvillohen për dyshimet e përfshirjes në shitjen dhe shpërndarjen e drogës, mëson ekskluzivisht Gazeta Sinjali.
Sipas informacioneve që ka siguruar Sinjali, i arrestuari është Eduard Neza, rreth 35-vjeçar, në pronën e të cilit hetuesit kanë realizuar bastisje të premten, më 13 nëntor, rreth orës 09:00.
Operacioni është zhvilluar në rrugën “Haxhi Zeka” në Gjakovë, në bazë të urdhëresës së lëshuar më 10 nëntor nga Gjykata Themelore në Gjakovë.
Gjatë kontrollit të shtëpisë dhe objekteve përcjellëse, hetuesit e Drejtorisë për Hetimin e Trafikimit me Narkotikë kanë gjetur dhe sekuestruar tri qese me substanca të dyshuara narkotike të llojeve kokainë, MDMA dhe ekstazi, me peshë të raportuar prej rreth 13.91 gramësh.
Po ashtu, janë sekuestruar dy qese me marihuanë, me peshë rreth 14.19 gramë, duke e çuar sasinë e përgjithshme të substancave të dyshuara në rreth 28.1 gramë.
Përveç drogës së dyshuar, Policia ka sekuestruar edhe dy peshore digjitale, 450 euro para të gatshme dhe një telefon mobil Samsung.
Për rezultatet e bastisjes është njoftuar Prokuroria Themelore në Gjakovë, Departamenti për Krime të Rënda.
Me vendim të Prokurorisë, ndaj 35-vjeçarit është caktuar masa e ndalimit për 48 orë.
I dyshuari është intervistuar në prani të avokatit mbrojtës.
Rasti po hetohet për veprën penale “Blerja, posedimi, shpërndarja dhe shitja e paautorizuar e substancave narkotike, psikotrope ose analoge”.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali
