Ish-udhëheqësi i bandës, Duane “Keffe D” Davis, është dënuar me 40 vjet burgim për organizimin e vrasjes së reperit të famshëm amerikan, Tupac Shakur, në një rast që për gati tri dekada mbeti një nga çështjet më të njohura të pazbardhura në Shtetet e Bashkuara.
Dënimi i Davisit shënon një zhvillim të rëndësishëm në këtë çështje, e cila ka intriguar adhuruesit e hip-hopit për gati 30 vjet, raporton CNN.
Prokurorët argumentuan se, ndonëse Davisi nuk e kishte qëlluar vetë armën, ai kishte udhëhequr grupin përgjegjës për vrasjen. Në librin e tij autobiografik, Davisi kishte pranuar se e kishte siguruar armën e përdorur në krim.
Gjatë seancës së dënimit të mbajtur të martën, prokurori Marc DiGiacomo tha se Davisi kishte kaluar vite duke u mburrur publikisht dhe duke folur për rolin e tij në vdekjen e Shakurit. Sipas tij, kjo vrasje “pati pasoja të gjera në mbarë botën”.
Motra e reperit, Sekyiwa Shakur, i tha gjykatës se humbja e vëllait kishte lënë pasoja të thella te familja.
“Humbja e Tupacit, për një kohë të gjatë, e paralizoi familjen time”, tha ajo.
Sekyiwa Shakur theksoi se vëllai i saj kishte pasur potencial të madh dhe synonte të ndikonte pozitivisht në shoqëri.
“Ai kishte kaq shumë potencial dhe synonte ta bënte botën një vend më të mirë”, tha ajo, duke shtuar se vëllai i saj kishte shpresuar të ndihmonte komunitetin e tij lokal.
Ajo i kërkoi gjykatësit që Davisit t’i shqiptohej dënimi maksimal. Edhe vëllai i reperit, Maurice Shakur, iu drejtua gjykatës, duke kërkuar “dënimin më të gjatë të mundshëm”.
Kur gjykatësja Carli Kierny e pyeti Davisin nëse kishte diçka për të thënë para shpalljes së dënimit, ai u përgjigj: “Jam në rregull. Patjetër që do ta apeloj këtë çështje.”
Para se të shpallte vendimin, gjykatësja Kierny iu drejtua Davisit, duke theksuar se një person nuk mund t’ia marrë jetën dikujt dhe më pas të vazhdojë jetën sikur të mos ketë ndodhur asgjë.
“Ti nuk mund t’ia marrësh një njeri familjes së tij.Nuk mund t’ia marrësh jetën, të ardhmen e tij të tërë dhe pastaj thjesht të vazhdosh jetën sikur të mos ketë ndodhur asgjë. Sidomos kur ai njeri është Tupac Shakur. Bota nuk e harroi kurrë atë dhe vdekjen e tij.”
Një nga provat kryesore në këtë çështje ishin deklaratat e vetë Davisit, i cili kishte pranuar vazhdimisht dhe publikisht se ndodhej në një automjet Cadillac të bardhë, nga i cili u qëlluan plumbat vdekjeprurës ndaj reperit.
Shakur ishte vetëm 25 vjeç dhe ndodhej në kulmin e karrierës së tij kur u vra. Ai konsiderohet një nga artistët më me ndikim në historinë e muzikës rep dhe ka shitur më shumë se 75 milionë disqe në mbarë botën.
Për gati tri dekada, hetimi për vrasjen e tij mbeti një nga çështjet kriminale më të njohura të pazbardhura në Amerikë, duke nxitur teori të shumta konspirative.
Gjatë gjyqit, ekipi mbrojtës i Davisit u përpoq ta bindte jurinë se deklaratat e tij ishin trillime, mburrje dhe ekzagjerime, të bëra me qëllim të shitjes së librave dhe përfitimit financiar.
Prokurorët argumentuan se Davisi, ish-udhëheqës i bandës së rrugës South Side Compton Crips, kishte organizuar sulmin dhe kishte siguruar armën që nipi i tij, Orlando Anderson, e përdori për të hapur zjarr ndaj Shakurit.
Anderson vdiq në vitin 1998, në një tjetër incident me armë zjarri, që nuk kishte lidhje me këtë çështje. Ai e kishte mohuar përfshirjen në vrasjen e reperit.
Sinjali – aty ku e vërteta flet para lajmit!
The post Duane “Keffe D” Davis dënohet me 40 vjet burgim për organizimin e vrasjes së Tupac Shakurit appeared first on Sinjali.
Burimi: Sinjali
