Zvicra po përballet me një valë të shtuar të spiunazhit të huaj, sulmeve kibernetike dhe rrezikut nga radikalizimi online i të rinjve. Kështu ka deklaruar Serge Bavaud, drejtori i Shërbimit Informativ të Konfederatës (NDB), në një intervistë për gazetën zvicerane Neue Zürcher Zeitung (NZZ), me rastin e njëvjetorit të marrjes së detyrës.
Sipas asaj që Bavaud ka deklaruar për Neue Zürcher Zeitung, Zvicra është kthyer në një objektiv të rëndësishëm për shërbimet e huaja të inteligjencës, veçanërisht ato nga Rusia, Kina dhe Irani. Qendra financiare, organizatat ndërkombëtare, universitetet elitare dhe ekonomia e fuqishme e bëjnë Zvicrën tejet tërheqëse për këto shtete, të cilat po përgatiten për konfliktet e së ardhmes ku epërsia teknologjike do të jetë vendimtare.
Kreu i inteligjencës zvicerane zbuloi gjatë bisedës me NZZ se spiunët po tentojnë të anashkalojnë sanksionet duke përdorur kompani fiktive dhe ndërmjetës për të eksportuar makineri të precizionit të lartë nga Zvicra në shtete të treta, si Kina. “Aty pajisjet mund të çmontohen dhe të rieksportohen në Rusi. Në fund, Moska mund të pajiset me makineri zvicerane që prodhojnë komponentë për dronë apo raketa”, paralajmëroi Bavaud. Ai shtoi se NDB-ja, në bashkëpunim me partnerët ndërkombëtarë, po punon intensivisht për të ndërprerë këto zinxhirë furnizimi dhe për të sensibilizuar industrinë vendase përmes një programi parandalues, transmeton Telegrafi.
Bavaud pranoi se shërbimet partnere të huaja po ushtrojnë presion të madh mbi Zvicrën që të tregohet më e ashpër ndaj agjentëve rusë. Ai paralajmëroi se nëse shtetet e tjera evropiane i zbulojnë dhe i dëbojnë spiunët, ndërsa Zvicra heziton, vendi rrezikon të shndërrohet në një bazë logjistike dhe operacionale për sulme hibride ruse ndaj Evropës – gjë që do të dëmtonte rëndë reputacionin e vendit. Megjithatë, ai sqaroi se vendimi për dëbimin e diplomatëve-spiunë i takon politikës, përkatësisht Departamentit të Punëve të Jashtme, dhe jo shërbimit sekret.
Sa i përket sigurisë së brendshme, Bavaud theksoi në intervistën për NZZ se kërcënimi terrorist mbetet i lartë, veçanërisht në prag të festave dhe hapjes së tregjeve të Krishtlindjeve. Sipas tij, grupet terroriste janë shumë aktive në internet, ku rekrutojnë dhe radikalizojnë të rinjtë. “Sot nuk ke më nevojë të udhëtosh drejt Sirisë për t’u radikalizuar – kjo mund të ndodhë në dhomën tënde, eventualisht bashkë me një shok”, u shpreh ai, duke përmendur si shembull sulmin me thikë ndaj një hebreu ortodoks në Zürich nga një i ri simpatizant i ISIS-it. Gjurmimi me kohë i këtyre “ujqve të vetmuar”, të cilët shpesh shtyhen nga magjepsja e thjeshtë pas dhunës, mbetet një nga sfidat më të mëdha të sigurisë.
Paralelisht me këto paralajmërime, 53-vjeçari Serge Bavaud – i cili ka gradën kolonel në ushtrinë zvicerane dhe drejton NDB-në që nga 1 nëntori 2025 pas një karriere të gjatë në diplomaci dhe menaxhim krizash – njoftoi të premten nga selia qendrore në Bernë se procesi disavjeçar dhe i diskutueshëm i ristrukturimit të shërbimit ka përfunduar. Struktura e re do të hyjë në fuqi në vitin 2027, duke e zvogëluar bordin drejtues nga gjashtë në katër persona dhe duke e ndarë shërbimin në katër fusha kryesore: Qeverisje, Operacione, Burime dhe Siguri, si dhe Teknologji./Telegrafi/
