Një aeroplan i kompanisë ajrore zvicerane Swiss ka ndërprerë tri herë radhazi përpjekjen për ngritje në aeroportin e Cyrihut, pasi sistemi automatik i kontrollit të shtytjes u çaktivizua gjatë procedurës.

Bëhet fjalë për fluturimin LX2110, i cili të martën ishte planifikuar të udhëtonte nga Cyrihu drejt Malagës në Spanjë, me një Airbus A220.
Një pasagjer, i identifikuar nga gazeta “Blick” si Fabian B., ka treguar se gjatë përpjekjes së parë avioni fillimisht përshpejtoi, por pilotët më pas frenuan papritur dhe ndërprenë ngritjen.
E njëjta situatë u përsërit edhe gjatë përpjekjes së dytë. Sipas pasagjerit, kapiteni njoftoi përmes interfonit se leva e shtytjes kishte dalë nga pozicioni gjatë ngritjes.
Pas një pritjeje të shkurtër, pilotët tentuan për herë të tretë të ngrinin aeroplanin, por edhe kjo përpjekje përfundoi me ndërprerjen e procedurës.
Pasagjeri shprehu habinë për vendimin që të provohej sërish ngritja, duke thënë se, sipas vëzhgimeve të tij, mes përpjekjes së dytë dhe të tretë nuk kishte ardhur asnjë personel teknik në bord për të kontrolluar problemin. Megjithatë, ai pranoi se nuk mund të dinte nëse ndërkohë ishte kryer ndonjë kontroll teknik në distancë.
Kapiteni u kishte thënë pasagjerëve se një situatë e tillë nuk i kishte ndodhur kurrë gjatë karrierës së tij 12-vjeçare.
Swiss shpjegon shkakun e ndërprerjeve
Kompania Swiss e konfirmoi incidentin, duke bërë të ditur se të tria përpjekjet për ngritje ishin ndërprerë gjatë lëvizjes në pistë, kur avioni kishte arritur shpejtësinë maksimale prej 50 kilometrash në orë, transmeton Telegrafi.
Sipas kompanisë, shkak ishte çaktivizimi i sistemit automatik të kontrollit të shtytjes.
Swiss shpjegoi se për identifikimin e shkaqeve të mundshme ishte përdorur një sistem që monitoron në kohë reale gjendjen teknike të avionit. Nga kjo analizë, sipas kompanisë, nuk ishin shfaqur gabime në sistem, prandaj ekuipazhi kishte vendosur të provonte edhe një herë ngritjen.
Pas dështimit të përpjekjes së tretë, pasagjerët u kthyen në portë dhe u transportuan drejt Malagës me një aeroplan tjetër. Ata mbërritën në destinacion me rreth tri orë e gjysmë vonesë.
Teknikët zbuluan problemin në avion
Kontrollet teknike zbuluan më pas se çelësi për çaktivizimin e kontrollit automatik të shtytjes në aeroplanin fillestar ishte bllokuar.
Si pasojë, sistemi automatik i kontrollit të shtytjes çaktivizohej gjatë përpjekjeve për ngritje. Për këtë arsye, u bë e nevojshme zëvendësimi i të gjithë mekanizmit të levës së shtytjes.
Swiss shprehu keqardhje për incidentin dhe tha se e kupton pasigurinë që mund të kenë përjetuar pasagjerët.
Kompania theksoi gjithashtu se pilotët e saj trajnohen rregullisht në simulatorë për manovra të tilla dhe se ndërprerja e ngritjes në rrethana të tilla është procedurë standarde, pasi siguria nuk vihet në kompromis./Telegrafi/





