Presidenti rus Vladimir Putin ka përdorur fjalimin e tij tradicional në Ditën e Fitores në Sheshin e Kuq në Moskë për të justifikuar luftën në Ukrainë dhe për të kritikuar NATO.
Duke folur para qindra ushtarakëve dhe disa liderëve botërorë, Putin tha se Rusia po zhvillon një “luftë të drejtë” dhe e cilësoi Ukrainën si një “forcë agresive” që, sipas tij, “po armatoset dhe mbështetet nga i gjithë blloku i NATO-s”.
Deklaratat e tij u bënë gjatë festimeve të zbehura në pjesë të ndryshme të Rusisë për Ditën e Fitores, festa më e madhe kombëtare e vendit që përkujton fitoren e Bashkimi Sovjetik ndaj Gjermanisë naziste në Luftën e Dytë Botërore, shkruan BBC, transmeton Dukagjini.
Para ceremonive, Rusia dhe Ukraina ranë dakord për një armëpushim treditor, i cili u njoftua nga presidenti amerikan Donald Trump të premten.
Për herë të parë pas shumë vitesh, parada e Ditës së Fitores në Moskë nuk përfshiu automjete të blinduara apo raketa balistike.
Megjithatë, nën masa të rrepta sigurie, qindra ushtarakë marshuan në Sheshin e Kuq.
Në fjalimin e tij, Putin përkujtoi sakrificat e ushtarëve sovjetikë gjatë Luftës së Dytë Botërore.
“Heroizmi i madh i gjeneratës fituese frymëzon ushtarët që po realizojnë objektivat e operacionit special ushtarak sot”, tha ai, duke iu referuar luftës në Ukrainë.
“Ata po përballen me një forcë agresive të armatosur dhe të mbështetur nga i gjithë blloku i NATO-s. Dhe pavarësisht kësaj, heronjtë tanë po ecin përpara”, shtoi presidenti rus.
Putin vlerësoi gjithashtu kontributin e qytetarëve rusë në përpjekjet e luftës, përfshirë shkencëtarët, shpikësit, gazetarët ushtarakë, mjekët dhe mësuesit.
“Pavarësisht se si ndryshojnë taktikat ushtarake, e ardhmja e vendit sigurohet nga njerëzit”, deklaroi ai.
Pranë Putinit ndodhej lideri bjellorus Alexander Lukashenko.
Në ceremoni morën pjesë edhe presidenti i Laos, Thongloun Sisoulith, mbreti i Malajzisë Sultan Ibrahim, presidenti i Kazakistanit Kassym-Jomart Tokayev dhe presidenti i Uzbekistanit Shavkat Mirziyoyev.
Kryeministri sllovak Robert Fico u pa gjithashtu në takim me Putinin në Kremlin para paradës.
Krahasuar me vitin e kaluar, në ceremoni morën pjesë dukshëm më pak liderë botërorë. Në paradën e 80-vjetorit vitin e kaluar kishin marrë pjesë 27 liderë, përfshirë presidentin kinez Xi Jinping dhe presidentin brazilian Luiz Inácio Lula da Silva.
Pas ceremonisë në Sheshin e Kuq, Putin vendosi lule te Varri i Ushtarit të Panjohur së bashku me liderët e tjerë, përpara se të merrte pjesë në një pritje në Kremlin.
Festime të tjera u mbajtën edhe në qytetet lindore të Rusisë, përfshirë Vladivostok, ku qytetarët morën pjesë në marshin “Regjimenti i Pavdekshëm”, kushtuar veteranëve të luftës.
Armëpushimi treditor mes Rusisë dhe Ukrainës dukej se po respektohej gjatë zhvillimit të ceremonive në pjesë të ndryshme të Rusisë.
Putin kishte shpallur më herët armëpushim për datat 8 dhe 9 maj, ndërsa Kievi kishte kërkuar armëpushim pa afat duke filluar nga 6 maji.
Që nga ato njoftime, të dy vendet kanë akuzuar njëri-tjetrin për shkelje të shumta të armëpushimit në vijën e frontit.
