Presidenti i Ukrainës, Volodymyr Zelensky, ka mbërritur të mërkurën në Madrid, në një vizitë të papritur që përfshin një varg takimesh të nivelit të lartë me udhëheqës ndërkombëtarë, në kuadër të Samitit Ibero-Amerikan.
Vizita e tij ishte mbajtur e fshehtë për arsye sigurie deri në momentin kur avioni presidencial u ul në kryeqytetin spanjoll. Gjatë qëndrimit dyditor, Zelensky pritet të zhvillojë takime me disa prej liderëve që janë mbledhur në Madrid për samitin.
Të enjten, presidenti ukrainas do të marrë pjesë në një takim me përfaqësues të lartë ndërkombëtarë, ku pritet të jenë të pranishëm edhe Sekretari i Përgjithshëm i Kombeve të Bashkuara, António Guterres, si dhe Presidenti i Këshillit Evropian, António Costa, raporton Euronews.
Në takim pritet të marrë pjesë edhe kryeministri spanjoll, Pedro Sánchez, së bashku me përfaqësues të tjerë të vendeve ibero-amerikane.
Përveç takimit të përbashkët, Zelensky do të zhvillojë bisedime dypalëshe me Sánchez-in dhe Mbretin e Spanjës, Felipe VI.
Samiti në Madrid shihet gjithashtu si një mundësi për Ukrainën që të forcojë marrëdhëniet me vendet e Amerikës Latine, një rajon ku lufta e nisur pas pushtimit rus të Ukrainës ka nxitur qëndrime të ndryshme.
Sipas burimeve qeveritare, Zelensky planifikon të takohet edhe me përfaqësues të disa prej 22 delegacioneve ibero-amerikane që ndodhen në kryeqytetin spanjoll.
Sinjali – aty ku e vërteta flet para lajmit!
Burimi: Sinjali
