Protestat në kryeqendrën e Shqipërisë vijojnë të jenë të dhunshme, ndërsa ka raportime për përplasje ndërmjet policisë dhe protestuesve.

Ndërkohë, kryeministri Edi Rama ka refuzuar të japë dorëheqje për shkak të protestave, por pranoi që disa nga kërkesat e protestuesve janë legjitime, transmeton Klankosova.tv.

Lidhur me zhvillimet e dy ditëve të fundit, në emisionin “Ora Shtatë” foli gazetari nga Shqipëria, Ervin Leka.

“E shtuna ishte protesta më aktive, por edhe më e dhunshme. Po ashtu, dita e shtunë siç duket, dy të shtunat, edhe ajo e kaluara, pati një agravim të situatës, ku pati më së shumti sulme ndaj Policisë, hedhje të sendeve, dhe bombave molotovë”, u shpreh ai në Klan Kosova.

Pos tjerash, gazetari foli edhe për rastin e 28-vjeçarit, i cili u godit me plumb gome në sy.

“Ai vazhdon ta ketë predhën e gomës në sy”, tha gazetari.