Bruno Fernandes ka marrë një vendim për të ardhmen e tij te Manchester Unitedi, pas bisedës sqaruese që zhvilloi të martën me trajnerin Michael Carrick.
Mesfushori portugez u kritikua nga tifozët e Unitedit pasi vuri në pikëpyetje taktikat e Carrickut, pas humbjes së thellë 4-1 ndaj Comos në Ligën e Kampionëve. Më pas, ai mbeti në bankën rezervë pa u aktivizuar në humbjen 3-0 ndaj Bournemouthit të dielën, ndërsa mori reagime të përziera nga tifozët në ‘Old Trafford’ kur doli për t’u ngrohur gjatë ndeshjes.
Që nga ajo kohë, e ardhmja e tij në klub është bërë temë e spekulimeve të shumta. Kontrata aktuale e Fernandesit skadon në qershor të vitit 2027, por Manchester Unitedi ka mundësinë ta zgjasë automatikisht edhe për një vit, një opsion që drejtuesit e INEOS synojnë ta shfrytëzojnë.
Fernandes iu bashkua “Djajve të Kuq” në janar të vitit 2020, duke ardhur nga Sporting Lisbona. Pas gati shtatë vjetësh në klub, shumë tifozë besonin se përplasjet në rritje mes tij dhe trajnerit mund të shënonin fundin e aventurës së portugezit në ‘Old Trafford’ më shpejt sesa pritej.
Megjithatë, pasi drejtuesit e klubit i konfirmuan Carrickut se do të ishte në krye të skuadrës për ndeshjen e së shtunës ndaj Chelseat, pavarësisht raportimeve se mund të shkarkohej, trajneri 45-vjeçar u takua menjëherë me kapitenin e ekipit për të sqaruar situatën.
Carrick dhe Fernandes u takuan të martën në mëngjes, para stërvitjes, në qendrën stërvitore të Manchester United në Carrington. Sipas The Guardian, futbollisti 32-vjeçar i dha trajnerit garanci se mbetet “plotësisht i përkushtuar” ndaj klubit dhe se synon të ndihmojë skuadrën ta përmbysë situatën e vështirë në këtë sezon.
Biseda vjen pasi Carrick vendosi ta linte jashtë formacionit titullar fanellën me numrin tetë në ndeshjen ndaj Bournemouthit, duke këmbëngulur se vendimi ishte marrë “vetëm për arsye futbollistike”.
Sezonin e kaluar, Fernandes ishte një nga lojtarët më vendimtarë të Manchester United. Ai regjistroi 21 asistime në Ligën Premier, duke vendosur rekord në këtë aspekt, dhe ndihmoi skuadrën të siguronte rikthimin në Ligën e Kampionëve./Telegrafi/
