Pres që Prokuroria Publike, ndoshta edhe Ministria e Punëve të Brendshme, por në këtë rast më shumë Prokuroria Publike, të dalë dhe të informojë se deri ku ka arritur rasti në Ohër.

Në veçanti, të sqarohet nëse janë marrë pajisjet elektronike nga familjarët e të dyshuarit dhe nga vetë dhunuesi, në mënyrë që të verifikohen pretendimet se mund të ketë pasur ndihmë pas kryerjes së veprës penale”.
Kështu deklaroi kryetarja e Lidhjes Demokratike, Monika Zajkova, në një intervistë me video për “Fokus”, duke shpjeguar arsyet pse në reagimin e saj të parë lidhur me rastin në Ohër kërkoi me ngulm sigurimin e të gjitha provave për bashkëkryerje dhe ndihmë në dhunën brutale ndaj Sarës, si dhe verifikimin e informacioneve që u publikuan menjëherë pas ngjarjes, sipas të cilave kishte pasur përpjekje për të fshehur gjurmët e krimit.
“Nuk më intereson kush janë prindërit e tyre, me çfarë merren në jetë, çfarë mbiemri kanë apo cilës parti në pushtet ose opozitë i përkasin. Mua më intereson që, nëse vërtet ka pasur ndihmë, ata të mbajnë përgjegjësi penale për këtë, sepse një gjë e tillë nuk duhet të mbetet pa u ndëshkuar”, deklaroi Zajkova.
Sipas saj, femicidi tashmë është një problem serioz shoqëror. Maqedonia renditet në vendin e tretë për nga numri i rasteve të femicidit për kokë banori, gjë që dëshmon se ky problem është i pranishëm dhe kërkon trajtim urgjent.
“Dhe këtu nuk shtrohet pyetja nëse dikush ka reaguar, por pse institucionet nuk kanë reaguar. Në të gjitha rastet shohim se nuk bëhet fjalë për ngjarje të izoluara, por për raste në të cilat institucionet dështojnë në veprimin e tyre. Si Ministria e Punëve të Brendshme, ashtu edhe Qendrat për Punë Sociale nuk veprojnë siç duhet. Edhe gjatë seancës mbikëqyrëse kemi theksuar se mungon bashkëpunimi dhe komunikimi ndërsektorial. E gjithë kjo duhet të marrë fund sa më shpejt”, thekson Zajkova.
Ajo shton se të gjitha institucionet kanë detyrim të ndërmarrin masa sa më parë, në mënyrë që krime të tilla të mos përsëriten në të ardhmen.





