Deputeti i Lëvizjes Vetëvendosje (LVV), Artan Abrashi, ka kërkuar hetim të menjëhershëm penal dhe zbardhjen e përgjegjësive institucionale pas vrasjes së Arlinda Zekajt.

Në seancën e Kuvendit të Kosovës, Abrashi ka ngritur pikëpyetje për mënyrën se si institucionet e drejtësisë e kanë trajtuar rastin, duke kërkuar sqarime për vlerësimin e rrezikut ndaj viktimës dhe vendimet e marra për mbrojtjen e saj.

Ai kërkoi që Këshilli Prokurorial i Kosovës (KPK) dhe Këshilli Gjyqësor i Kosovës (KGJK) të zbardhin vendimet, udhëzimet dhe mosveprimet eventuale të institucioneve, si dhe të identifikojnë personat përgjegjës.

Sipas Abrashit, masat disiplinore nuk janë të mjaftueshme dhe duhet të nisin hetime penale për të përcaktuar përgjegjësinë eventuale të zyrtarëve.

“Kush e vlerësoi rrezikun? Kush vendosi se ajo ishte e sigurt të qëndronte aty? Pse nuk dha urdhër prokurorja të sigurohej shtëpia? Kanë kaluar tri ditë, KPK-ja dhe KGJK-ja duhet të zbardhin menjëherë çdo vendim, udhëzim dhe mosveprim. Të identifikohen përgjegjësit dhe të nisin procedurat përkatëse. Nuk mjafton masa disiplinore. Duhet hetim penal sa më parë dhe asnjë minutë më shumë. E mbështesim protestën”, shtoi ai.

Deputeti i LVV-së ka ngritur gjithashtu çështjen e trajtimit nga Prokuroria të denoncimit që Arlinda Zekaj, sipas deklaratës së tij, kishte bërë për kërcënim me vrasje. Ai kërkoi të sqarohet pse nuk ishte ndërmarrë veprimi i duhur dhe mbi çfarë arsyetimi një person ishte trajtuar si dëshmitar.

Abrashi kritikoi edhe një vendim të Gjykatës Themelore, për të cilin tha se kishte paraparë një urdhër mbrojtjeje që lejonte afrimin deri në dy metra brenda shtëpisë.

“Pse Prokuroria nuk veproi ndaj tij kur Arlinda e denoncoi për kërcënim me vrasje? Kush vendosi ta trajtonte si dëshmitar? Me çfarë arsyetimi? Kush i kishte duart e lira të kërcënonte dhe kush ia garantonte këtë paprekshmëri? Gjykata Themelore, në pjesën e saj, nxori një urdhër mbrojtjeje që lejonte afrimin deri në dy metra brenda shtëpisë. Dy metra? Çfarë mbrojtjeje është kjo? Një grua e kërcënuar nga dy burra detyrohet të jetojë dy metra larg njërit prej të cilëve kërkonte mbrojtje dhe asnjë metër prej tjetrit. Kjo është mizori dhe jo drejtësi. Avokatja e kishte paralajmëruar për rrezikun dhe kishte kërkuar hetim disiplinor. Kryeprokuroria e Pejës e refuzoi kërkesën. Bëhet fjalë për dy burra me plot vepra penale”, shtoi ai. /kp/