Platformat e tregtimit të kriptovalutave po forcojnë sigurinë dhe po kërkojnë bashkëpunim më të ngushtë pas sulmit ndaj Binance, ku u vodhën rreth 6,3 miliardë dollarë, raporton Reuters përcjell Dukagjini.

Coinbase ka ndërhyrë në sistemet që ruajnë çelësat digjitalë jashtë internetit, si masë paraprake. Kraken po shqyrton incidentin për të identifikuar përmirësime të mundshme në mbrojtjen e vet.

Binance pezulloi tërheqjet dhe u zotua t’i mbulojë humbjet me fondet e kompanisë. Sipas bashkëdrejtorit Richard Teng, sulmi mund të ketë nisur nga komprometimi i laptopit të një inxhinieri, përmes të cilit hakerët depërtuan në sistemet e përpunimit të tërheqjeve.

Kompanitë analitike TRM Labs dhe Chainalysis evidentuan ngjashmëri me sulme të mëparshme që i janë atribuar Koresë së Veriut. Pheniani i mohon vazhdimisht akuzat për vjedhje kriptovalutash.

Ndërkohë, Tether njoftoi ngrirjen e afro 1,57 miliardë dollarëve të lidhur me incidentin, ndërsa Circle bllokoi 800 milionë dollarë.

Drejtues të sektorit kërkuan krijimin e një sistemi alarmi në kohë reale, që do të mundësonte shkëmbimin e menjëhershëm të informacionit, reagimin e koordinuar dhe ngrirjen e përkohshme të fondeve të dyshuara si të vjedhura.

Burimi: Dukagjini