Ushtarët italianë nga Ekipi për Bashkëpunim Civilo-Ushtarak (CIMIC), të caktuar në kuadër të Komandës Rajonale në Perëndim (RC-W) të misionit të KFOR-it, kanë realizuar një projekt për mbështetjen e Stacionit të Zjarrfikësve në Pejë.
Ceremonia e pranim-dorëzimit u drejtua nga komandanti i RC-W-së, koloneli Giuseppe De Blasi, dhe drejtori ekzekutiv i Agjencisë së Menaxhimit të Emergjencave (AME), Shefki Abdullahu.
Në kuadër të këtij projekti, zjarrfikësve në Pejë u është dorëzuar një automjet i ri i tipit “pickup”, i pajisur me një sistem të avancuar për shuarjen e zjarreve.
Sipas KFOR-it, automjeti i ri pritet të forcojë kapacitetet operacionale të shërbimit lokal të zjarrfikësve dhe të kontribuojë në krijimin e një mjedisi më të sigurt për të gjithë banorët e komunës së Pejës.
Nga KFOR-i kanë theksuar se kjo nismë dëshmon përkushtimin e vazhdueshëm të misionit për bashkëpunim me partnerët vendorë, përmes projekteve që janë në dobi të komuniteteve lokale.
KFOR-i ka ritheksuar se këto projekte realizohen në mënyrë të paanshme dhe synojnë të sjellin përfitime për të gjithë qytetarët në Kosovë.
Sinjali – aty ku e vërteta flet para lajmit!
Burimi: Sinjali
