Avokati Artan Qerkini ka kritikuar vendimin për urdhrin mbrojtës në rastin e Arlinda Zekajt, e cila u vra në Pejë, duke e cilësuar si absurd përcaktimin e distancës prej vetëm dy metrash.

Qerkini në emisionin “Rubikon” në Klan Kosova, tha se një urdhër mbrojtës duhet të jetë i zbatueshëm dhe të shërbejë realisht për mbrojtjen e viktimës, e jo të lëshohet vetëm për ta përmbushur një obligim formal.

“Kur lëshohet urdhri për mbrojtje, aty ndalohet edhe dhuna verbale. Ti prej dy metrash, minimalisht, dhunë verbale mundesh me pas. Domethënë, është absurd i llojit të vet”, deklaroi Qerkini.

Ai kritikoi mënyrën se si ishte përcaktuar masa, duke theksuar se vendimet gjyqësore duhet të merren duke pasur parasysh rrezikun konkret dhe rrethanat në të cilat ndodhet viktima.

“Vendimi nuk bëhet vetëm sa për ta kryer një obligim. Gjykata e lëshoi një urdhër për mbrojtje dhe e përmbushi obligimin e vet në aspektin formal. Mirëpo, urdhri gjyqësor duhet të jetë i zbatueshëm dhe duhet të jetë në funksion të mbrojtjes, sepse është urdhër për mbrojtje”, u shpreh ai./Klankosova.tv