Ka marrë fund shqetësimi i një familjeje në Prishtinë, e cila prej disa ditësh nuk kishte asnjë informacion për vendndodhjen e një familjari të saj. Burri që ishte larguar nga shtëpia mbrëmjen e së enjtes dhe nuk ishte kthyer më, është gjetur shëndoshë e mirë pranë Xhamisë së Llapit, raporton Gazeta Sinjali.
Burimet e Sinjalit bëjnë me dije se bëhet fjalë për Afrim Demollin, të lindur në vitin 1972, zhdukja e të cilit ishte denoncuar në Polici nga vëllai i tij.
Gjithçka kishte nisur më 22 tetor 2026, rreth orës 22:00, kur 54-vjeçari ishte larguar nga shtëpia në rrugën “Tomorri” në Prishtinë, pa u kthyer më.
Pas dy ditësh pa informacione për vendndodhjen e tij, më 24 tetor, rreth orës 18:00, vëllai i tij ishte paraqitur në Stacionin Policor Veriu për ta raportuar të zhdukur.
Sipas deklarimit të familjarit, Afrimi kishte probleme shëndetësore dhe edhe më herët kishte ndodhur të largohej nga shtëpia, mirëpo në ato raste ishte kthyer.
Këtë herë, mungesa e tij kishte zgjatur më shumë, duke shtuar shqetësimin e familjes.
Mirëpo, mëngjesi i së dielës solli lajmin që familjarët po prisnin.
Rreth orës 08:00 të datës 25 tetor, Gëzim Demolli e kishte gjetur vëllain e tij në afërsi të Xhamisë së Llapit në Prishtinë.
54-vjeçari ishte në gjendje të mirë shëndetësore dhe ishte kthyer në shtëpi, ku tashmë ndodhet nën përkujdesjen e familjarëve.
Rreth orës 11:50, vëllai është paraqitur sërish në Stacionin Policor Veriu, kësaj radhe për të dhënë lajmin se familjari i raportuar i zhdukur ishte gjetur.
Pas konfirmimit të informacionit, është njoftuar Prokurori i Shtetit, me udhëzim të të cilit rasti është mbyllur.
Kështu, pas tri ditësh pasigurie, kërkimi i familjes Demolli ka përfunduar me kthimin e 54-vjeçarit në shtëpi.
Sinjali – aty ku e vërteta flet para lajmit!
Burimi: Sinjali
