Presidenti amerikan, Donald Trump, ka rikthyer retorikën për një ndërhyrje të mundshme në Kubë, duke deklaruar se anijet luftarake të Shteteve të Bashkuara mund të ndalen pranë ishullit gjatë kthimit nga Irani.

Gjatë një tubimi në Florida, Trump tha se administrata e tij do të merret me Kubën pasi të përfundojë çështjen e Iranit, pa dhënë detaje konkrete për hapat që mund të ndërmarrë Uashingtoni.

“Do të merremi me Kubën gjatë kthimit nga Irani. Do të bëjmë një ndalesë të shkurtër”, deklaroi presidenti amerikan.

Ai përmendi edhe mundësinë që anijet luftarake amerikane të afrohen pranë bregdetit kuban, duke lënë të kuptohet se Uashingtoni mund të ushtrojë presion ndaj autoriteteve të ishullit.

Trump nuk paraqiti ndonjë plan konkret për ndërhyrje ushtarake. Megjithatë, deklaratat e tij vijnë në një kohë kur administrata amerikane ka shtuar presionin ndaj qeverisë komuniste të Kubës.

Sekretari amerikan i Shtetit, Marco Rubio, ka mbështetur një qëndrim të ashpër ndaj Havanës, duke argumentuar se lidhjet e saj me kundërshtarët e SHBA-së përbëjnë shqetësim për sigurinë kombëtare amerikane.

Ndërkohë, Kuba po përballet me një krizë të rëndë ekonomike dhe energjetike, me mungesa karburanti, ndërprerje të shpeshta të energjisë elektrike dhe vështirësi në furnizimin me ushqime.

Pavarësisht retorikës së ashpër, Trump ka deklaruar më herët se pret që Uashingtoni dhe Havana të arrijnë një marrëveshje, duke lënë të hapur mundësinë e një zgjidhjeje pa përdorimin e forcës ushtarake. /Telegrafi/