Tre persona janë arrestuar nën dyshimin për vjedhje të rëndë në fshatin Ticë të Skenderajt, pasi në veturën me të cilën po udhëtonin janë gjetur gjësende të ndryshme që dyshohet se ishin vjedhur nga një lokal, si dhe një armë zjarri me municion.

Sipas raportit të Policisë së Kosovës, rasti ka ndodhur më 26 tetor 2026, rreth orës 00:30, kur tre të dyshuarit, meshkuj kosovarë, janë takuar me një veturë në të cilën kishin ngarkuar sende të ndryshme.

Gjatë kontrollit, policia ka gjetur cigare, një motosharrë, maska, kapela, orë dore, një sëpatë, një çekan, si dhe para të metalta dhe të letrës. Sipas dyshimeve, këto gjësende ishin vjedhur nga një lokal.

Përveç sendeve të dyshuara si të vjedhura, te të dyshuarit është gjetur dhe sekuestruar edhe një pistoletë me karikator dhe gjashtë fishekë.

Pas arrestimit, policia është konsultuar me prokurorin kompetent, i cili ka vendosur që dy nga të dyshuarit të dërgohen në mbajtje.

Ndërkaq, i dyshuari i tretë, i cili është i mitur, i është dorëzuar Stacionit Policor në Malishevë. Sipas raportit policor, ai ishte liruar më herët me kusht për një periudhë dyvjeçare, në lidhje me raste të vjedhjeve.

Rasti është iniciuar si “Vjedhje e rëndë”, ndërsa sendet e sekuestruara pritet të shërbejnë si prova në procedurat hetimore. Autoritetet kompetente do të vazhdojnë trajtimin e rastit për të sqaruar plotësisht rrethanat dhe përgjegjësinë e të dyshuarve. /Telegrafi/