Skuadra e Marseille raportohet se ka refuzuar kërkesën e re të drejtuesve të klubit për uljen e pagave, në një kohë kur gjiganti francez po përballet me presion të madh financiar.

Sipas mediumit Foot Mercato, klubi ka kërkuar nga disa futbollistë që të pranojnë një tjetër sakrificë financiare, por të gjithë kanë refuzuar, duke bërë që palët të mos arrijnë marrëveshje për uljen e pagave.

Marseille ndodhet nën mbikëqyrjen e organit francez të kontrollit financiar të klubeve, DNCG.

Më 26 qershor, ky institucion vendosi kufizime për fondin e pagave dhe shpenzimet e klubit për transferime, pas shkeljeve të rënda financiare dhe humbjeve të jashtëzakonshme të të ardhurave.

Klubi kishte ndërmarrë masa të mëdha kursimi edhe gjatë verës së kaluar, kur u larguan disa futbollistë të rëndësishëm dhe nuk u realizua asnjë transferim i ri.

Presidenti Stephane Richard kishte deklaruar se synimi ishte ulja e fondit të pagave me 30 deri në 35 për qind, krahasuar me sezonin paraprak.

Megjithatë, situata është komplikuar nga fakti se kontratat e futbollistëve janë negociuar individualisht, duke kufizuar mundësitë e drejtuesve për të imponuar ndryshime të njëanshme në paga.

Në këto rrethana, Marseille mund të detyrohet të shqyrtojë alternativa të tjera për të lehtësuar presionin financiar, përfshirë largimin e futbollistëve ose ristrukturimin e kontratave përmes marrëveshjeve të reja./Telegrafi/