Tabela hipotetike e Ligës Premier, e bazuar në vendimet e gabuara të gjyqtarëve dhe VAR-it, ka zbuluar se cilat skuadra do të kishin më shumë ose më pak pikë nëse gabimet e referimit nuk do të ndikonin në rezultatet e ndeshjeve.

Analiza mbështetet në vlerësimet e Panelit për Incidente Kyçe të Ndeshjeve (KMI), i cili shqyrton vendimet kryesore të gjyqtarëve dhe ndërhyrjet e VAR-it. Paneli përbëhet nga pesë anëtarë, përfshirë ish-futbollistë ose trajnerë, si dhe përfaqësues të gjyqtarëve profesionistë dhe të Ligës Premier.

Sipas tabelës hipotetike, Manchester City është ndër skuadrat që do të humbnin më shumë pikë, ndërsa Liverpooli dhe Brentfordi do të përfitonin nga korrigjimi i disa vendimeve të diskutueshme.

Vendimi për golin e Erling Haalandit, i cili i dha Manchester Cityt fitoren ndaj Manchester Unitedit, u vlerësua si i gabuar nga paneli. Si rrjedhojë, City do të kishte dy pikë më pak, duke e bërë garën në krye më të ngushtë dhe Arsenalin vetëm një pikë prapa.

Liverpooli do të përfitonte dy pikë nga vendimi për penalltinë e akorduar gabimisht në favor të Nottingham Forestit në barazimin 2-2 në “Anfield”. Në këtë skenar, Liverpooli do të fitonte 2-1 dhe do të ngjitej mbi Chelsean në renditje.

Edhe Brentfordi do të fitonte dy pikë, pasi paneli vlerësoi se skuadrës duhej t’i jepej një penallti në barazimin 1-1 kundër Leedsit. Megjithatë, nuk mund të dihet nëse penalltia do të shndërrohej në golin e fitores.

Një tjetër vendim i diskutueshëm ishte goli i dytë i Crystal Palace në fitoren 3-1 ndaj Nottingham Forestit. Paneli vlerësoi, me rezultat 3-2, se gjyqtari kishte gabuar duke mos e anuluar golin për shkak të një prekjeje të dyshuar me dorë. Ky vendim, megjithatë, nuk do ta ndryshonte rezultatin hipotetik të Forestit.

Liga Premier ka bërë të ditur se, nga 114 incidente kyçe të shqyrtuara nga gjyqtarët, 89 për qind e vendimeve në fushë janë vlerësuar të sakta, krahasuar me 86 për qind në të njëjtën fazë të sezonit të kaluar. Pas ndërhyrjeve të VAR-it, 98 për qind e vendimeve të këtij sezoni janë vlerësuar të sakta.

Kështu do të dukej tabela e Ligës Premier nëse nuk do të kishte gabime të gjyqtarëve:

/Telegrafi/