Mungesa e banesave me qira të përballueshme po bëhet një problem gjithnjë e më i madh në Zvicër. Një studim i realizuar në Austri ka identifikuar disa zgjidhje të mundshme për këtë çështje, të cilat mund të jenë të zbatueshme edhe në Zvicër. Gjetjet janë analizuar edhe nga Zyra Federale për Zhvillimin Hapësinor (ARE).

Studimi i Universitetit të Teknologjisë së Vjenës ka shqyrtuar situatën e strehimit në pesë zona metropolitane: Lille, Salzburg, Hanover, Mynih dhe Gent. Të gjitha këto zona po përballen me mungesë të banesave, ndërsa gjetjet e studimit janë analizuar nga ARE për të vlerësuar se cilat prej zgjidhjeve mund të përshtaten me rrethanat në Zvicër, raporton Watson.

Një nga përfundimet kryesore lidhet me nevojën për stimuj financiarë për komunat. Sipas studimit, vendosja e objektivave detyruese për ndërtimin e një numri të caktuar banesash nuk mjafton. Nëse komunat përballen vetëm me detyrimin për të përmbushur këto objektiva, ato mund të zgjedhin më mirë të paguajnë gjobën.

Ndërkaq, ofrimi i subvencioneve mund t’i motivojë më shumë komunat që të realizojnë objektivat, pasi fondet mund të përdoren për përshtatjen e infrastrukturës me rritjen e popullsisë.

Një tjetër dallim që evidenton studimi është mënyra e organizimit të politikave të strehimit. Në qytetet e analizuara, politikat përcaktohen në nivel rajonal, ndërsa në Zvicër secila komunë vendos në mënyrë të pavarur. Për këtë arsye, një qasje më pak e decentralizuar në politikat e strehimit mund të jetë e dobishme edhe për vendin.

Airbnb dhe qiratë afatshkurtra, një tjetër sfidë

Probleme të veçanta me mungesën e banesave po përjetojnë qytetet që tërheqin shumë turistë. Një prej faktorëve është dhënia e apartamenteve me qira afatshkurtër përmes platformave si Airbnb, transmeton Telegrafi.

Disa vende kanë ndërmarrë masa për ta kufizuar këtë praktikë. Sipas Vincent Clapasson nga kompania e shërbimeve të pasurive të paluajtshme Wüest Partner, masa të tilla mund të kenë kuptim edhe në qytete zvicerane si Cyrihu dhe Gjeneva.

Për qytetet e tjera, Clapasson sheh më shumë potencial te subvencionet. Ai thekson se në Zvicër ekzistojnë tashmë forma të mbështetjes indirekte për banesat me qira të përballueshme.

“Ekzistojnë tashmë subvencione indirekte: Nëse një kooperativë dëshiron të realizojë një projekt me qira të përballueshme, shpesh ekziston një garanci nga shteti ose sigurimi i tokës nga një bashki sipas një kontrate qiraje ndërtimi”, shpjegon Clapasson.

Studimi rekomandon gjithashtu përfshirjen e personave që mund të paraqesin kundërshtime gjatë procedurave të miratimit të projekteve të ndërtimit. Krahas kësaj, qasjet më ekologjike dhe ato që marrin parasysh përgjegjësinë sociale mund të kontribuojnë në gjetjen e zgjidhjeve për mungesën e banesave./Telegrafi/