Spinaqi përmban pak karbohidrate dhe është i pasur me fibra, prandaj nutricionistët e konsiderojnë një ushqim që mund të ndihmojë në parandalimin e rritjes së menjëhershme të sheqerit në gjak pas ngrënies.

Përfitimet mund të jenë më të mëdha kur ai kombinohet me proteina dhe bishtajore.

Revista amerikane Parade ka biseduar me disa nutricionistë rreth ushqimeve që ndihmojnë në kontrollin e sheqerit në gjak, ndër të cilat përfshihet edhe spinaqi i ngrirë.

Foto ilustruese

Sipas nutricionistes Elizabeth Huggins, një filxhan spinaq i ngrirë dhe i zier përmban rreth 10 gramë karbohidrate, prej të cilave tetë gramë janë fibra, të cilat ndihmojnë në ngadalësimin e përthithjes së sheqernave.

Çfarë duhet shmangur?

Nutricionistja Mariana Dineen, themeluese e Elemento Health, këshillon shmangien e spinaqit të përgatitur me ajkë qumështi, pasi mund të përmbajë sheqerna dhe niseshte të shtuara, të cilat mund të ndikojnë në kontrollin e glukozës.

E njëjta vlen edhe për produktet e gatshme të ngrira që përmbajnë salca dhe përbërës shtesë.

Me çfarë duhet kombinuar spinaqi?

Dineen rekomandon që spinaqi të konsumohet së bashku me proteina dhe ushqime të pasura me fibra, si fasulet ose quinoa, si dhe me avokado.

Ky kombinim krijon një vakt ushqyes dhe mund të ndihmojë në shmangien e rritjes së shpejtë të sheqerit në gjak.

Spinaqi i ngrirë është gjithashtu i lehtë për t’u përgatitur dhe mund të shtohet në supa, gjellë, omëleta ose të shërbehet si shoqërues i mishit dhe peshkut.

Megjithatë, nutricionistët theksojnë se asnjë ushqim i vetëm nuk mund ta zëvendësojë trajtimin mjekësor.

Personat me diabet duhet të konsultohen me mjekun përpara se të bëjnë ndryshime të rëndësishme në ushqyerjen e tyre. /Telegrafi/