Ish-trajneri i Francës, Didier Deschamps, është shfaqur si kandidat për ta zëvendësuar Luciano Spallettin në stolin e Juventusit, pasi pozita e këtij të fundit është dobësuar ndjeshëm pas humbjes nga Genoa.
Juventusi pësoi humbje 2-0 ndaj Genoas të mërkurën mbrëma, duke mbetur në vendin e tetë në tabelën e Serie A pas nëntë xhirove.
Sipas mediumit italian La Stampa, kjo humbje ka shtuar presionin mbi Spallettin, ndërsa drejtuesit e klubit kanë nisur të shqyrtojnë mundësitë për ta zëvendësuar atë.
E njëjta gazetë raporton se Juventusi ka kontaktuar tashmë me Deschampsin, i cili ka qenë pa angazhim që nga largimi nga drejtimi i Kombëtares së Francës pas Kupës së Botës 2026. Sipas La Stampa, tekniku francez ka përcjellë përmes një ndërmjetësi se është i gatshëm për këtë mundësi.
Përveç Deschampsit, në mesin e emrave të përmendur nga mediat italiane janë edhe Stefano Pioli dhe Antonio Conte. Ndërkohë, La Repubblica shkruan se Conte preferon të presë për të parë se si do të zhvillohet situata te Manchester United.
Ndeshja e radhës mund të jetë vendimtare për të ardhmen e Spallettit. Juventusi do ta presë Napolin të dielën në Allianz Stadium, në një përballje që mund të ndikojë drejtpërdrejt në vazhdimësinë e trajnerit italian.
Spalletti është në krye të Juventusit që nga tetori i vitit 2025, kur mori drejtimin e skuadrës pas Igor Tudorit.
Deschamps, ndërkaq, ka një histori të rëndësishme me klubin torinez. Ai ishte futbollist i Juventusit nga viti 1994 deri në vitin 1999, periudhë gjatë së cilës fitoi Ligën e Kampionëve në vitin 1996 dhe tre tituj të kampionit të Italisë.
Francezi u rikthye te Juventusi në vitin 2006, këtë herë si trajner, pas rënies së klubit në Serie B si pasojë e aferës Calciopoli. Në sezonin e tij të parë, ai ndihmoi skuadrën të rikthehej në elitën e futbollit italian.
Sinjali – aty ku e vërteta flet para lajmit!
Burimi: Sinjali
