Kosova ka kaluar një tjetër 24-orësh të ngarkuar me ngjarje të rënda, ku nuk kanë munguar aksidentet me pasoja fatale, rastet e dhunës në familje, përleshjet, kërcënimet, vjedhjet dhe personat e zhdukur. Policia dhe Prokuroria kanë ndërmarrë veprime hetimore në disa qytete të vendit, ndërsa në disa raste të dyshuarit janë ndaluar për 24 apo 48 orë.
Ferizaj – Një përleshje fizike ka nxjerrë në pah edhe posedimin e një arme zjarri. 26-vjeçari Endrit Salihu ka pranuar se kishte me vete një pistoletë të tipit “Ekol”, të cilën e ka dorëzuar në Polici. Ai dhe dy persona të tjerë janë liruar në procedurë të rregullt, ndërsa rasti po hetohet edhe për armëmbajtje pa leje.
Fushë Kosovë – Ka ndërruar jetë 76-vjeçari Avdullah Avdyli, i cili ishte goditur nga një veturë më 4 tetor. Ai ndërroi jetë pas 20 ditësh trajtimi në QKUK. Sipas pamjeve të siguruara nga hetuesit, këmbësori dyshohet se kishte hyrë me vrap në rrugë kur semafori ishte i kuq për këmbësorët. Trupi i tij është dërguar për autopsi.
Kaçanik – Një 56-vjeçar është ndaluar për 48 orë, pasi bashkëshortja e tij 54-vjeçare e ka denoncuar për dhunë psikologjike në fshatin Vataj. Sipas deklarimit të gruas, ai i kishte bërtitur dhe i kishte bërë presion të vazhdueshëm. Rasti po hetohet si “Dhuna në familje”.
Gjakovë – 17-vjeçari që kërkohej lidhur me të shtënat me armë zjarri është paraqitur vetë në Polici. Atij i është sekuestruar një pistoletë me karikator të zbrazët, ndërsa është ndaluar për 24 orë. I mituri dyshohet se kishte shtënë disa herë pas një mosmarrëveshjeje me një person tjetër.
Prishtinë – Një 40-vjeçare ka denoncuar bashkëshortin 39-vjeçar, duke pretenduar se ai e kishte kapur për flokësh. I dyshuari i ka mohuar pretendimet, ndërsa pas intervistimit është liruar në procedurë të rregullt. Rasti po trajtohet si “Dhuna në familje”.
Zubin Potok – Një 72-vjeçar nga fshati Dragalicë ka denoncuar kërcënimet e Zoran Jovanovicit, i cili dyshohet se ia ka hedhur telefonin në Liqenin e Ujmanit. Sipas denoncimit, i njëjti person tri ditë më parë ia kishte hedhur në liqen edhe motosharrën. Rasti po hetohet për kanosje dhe dëmtim të pasurisë.
Prizren – Një 48-vjeçar nga Serbica e Epërme ka njoftuar vetë Policinë se në shtëpi mbante një pushkë gjuetie të trashëguar nga babai i ndjerë. Policia ia ka sekuestruar armën dhe 21 fishekë, ndërsa ndaj tij është iniciuar procedurë për armëmbajtje pa leje.
Gjakovë – Një konflikt familjar në fshatin Hereq dyshohet se ka përfunduar me sulm fizik dhe dëbimin nga shtëpia të një 43-vjeçareje dhe nënës së saj 63-vjeçare. Policia ka arrestuar vëllanë e gruas, 33-vjeçarin L.T., ndaj të cilit është caktuar ndalimi prej 48 orësh. Rasti po hetohet si “Dhuna në familje”.
Prishtinë–Ferizaj – Një motoçiklist ka humbur jetën në një aksident të rëndë në Llapnasellë, përballë objektit “Day to Day”. Në aksident janë përfshirë një motoçikletë Yamaha dhe dy vetura, një Volkswagen Passat dhe një BMW. Identiteti i viktimës nuk ishte konfirmuar në informacionet fillestare, ndërsa hetimet po vazhdojnë për të sqaruar rrethanat.
Suharekë – Ka përfunduar shqetësimi i një familjeje për zhdukjen e vajzës së tyre 13-vjeçare, e cila është kthyer shëndoshë e mirë në shtëpi. E mitura ishte raportuar e zhdukur më 23 tetor, ndërsa sipas deklarimit të nënës, gjatë kohës sa nuk dihej vendndodhja e saj, ajo dyshohet se kishte qëndruar te disa shoqe.
Prizren – Një 36-vjeçar, Edon Bytyqi, është ekstraduar nga Gjermania në Kosovë, nën dyshimin për një varg mashtrimesh. Ai dyshohet se kishte përdorur profile të rreme dhe identitete të personave të tjerë, përfshirë persona zyrtarë, për t’u marrë para qytetarëve. Pas ekstradimit, ndaj tij është caktuar ndalimi prej 48 orësh.
Prishtinë – Një 54-vjeçar, Afrim Demolli, është raportuar i zhdukur pasi ishte larguar nga shtëpia në rrugën “Tomorri” më 22 tetor dhe nuk ishte kthyer më. Zhdukjen e tij e ka denoncuar vëllai, ndërsa deri në informacionet e fundit nuk kishte të dhëna të konfirmuara për vendndodhjen e tij.
Skenderaj – Një 79-vjeçar, Fekë Zeneli, është gjetur i shtrirë në rrugë në fshatin Likoc, ndërsa vdekja e tij është konstatuar në QKMF. Me urdhër të Prokurorit të Shtetit, trupi i pajetë është dërguar në Institutin e Mjekësisë Ligjore për obduksion. Rasti është iniciuar si “Hetim mbi vdekjen”, ndërsa shkaku mbetet i panjohur.
Lipjan – Një vjedhje e rëndë është raportuar në Janjevë, ku persona të panjohur kanë hyrë me forcë në një shtëpi dhe kanë marrë një kasafortë me 4 mijë euro, stoli ari në vlerë prej rreth 8 mijë eurosh dhe një pistoletë “Beretta” me leje. Dëmi i përgjithshëm nga paratë dhe stolitë arrin rreth 12 mijë euro. Autorët nuk janë identifikuar.
Lipjan – Një 43-vjeçar ka denoncuar se është grabitur nën kërcënimin e thikës në fshatin Akllap. Sipas denoncimit, Arta Aliu, të cilën viktima e njihte më herët, e kishte marrë me veturë, duke i thënë se automjeti ishte prishur. Më pas, Betim Bedrolli, i paraqitur si “mjeshtër”, dyshohet se e kishte dërguar pranë një zone malore, ku viktima ishte kërcënuar me thikë dhe ishte detyruar t’i dorëzonte sendet personale. Të dy të dyshuarit po kërkohen nga Policia.
Pejë – 21-vjeçari Shqiprim Meziu është raportuar i zhdukur pasi ishte larguar nga shtëpia në orët e para të mëngjesit, duke lënë në veturë telefonin dhe dokumentet personale. Kamerat e sigurisë e kanë kapur duke lëvizur nga Çarshia e Gjatë në drejtim të rrugës “Emrush Miftari”, por më pas gjurmët e tij humbin. Policia po vazhdon hetimet për gjetjen e tij.
Gjilan – Një 60-vjeçare, Fahrije Hoxha, ka ndërruar jetë pasi është rrëzuar papritur derisa po ecte në rrugën “Halil Alidema”. Ajo ishte dërguar me shenja jete në Spitalin Rajonal të Gjilanit, por mjekët nuk kanë arritur ta shpëtojnë. Trupi i saj është dërguar për autopsi, ndërsa shkaku i vdekjes mbetet për t’u përcaktuar.
Podujevë – Dy persona, Kastriot Vllasa, 27 vjeç, dhe Alban Vllasa, 34 vjeç, janë ndaluar për 48 orë nën dyshimin se kanë sulmuar fizikisht një 23-vjeçar në rrugën “Jusuf Gërvalla”. Viktima ka pranuar trajtim mjekësor, ndërsa rasti është iniciuar për “Lëndim të lehtë trupor”.
Skenderaj – Një ndjekje policore në fshatin Llaushë ka përfunduar me aksident, ku një veturë e dyshuar ka goditur automjetin zyrtar dhe e ka nxjerrë nga rruga. Dy policë kanë mbetur të lënduar, ndërsa shoferi është larguar dhe vetura është gjetur më pas e braktisur në fshatin Rezallë. Pronari dhe mekaniku janë intervistuar, por deri në informacionet e fundit nuk ishte identifikuar personi që po drejtonte automjetin.
SINJALI 24 – Kur ti flije, ne e përcollëm Kosovën.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
Burimi: Sinjali
