Mollët dhe patatet mund të qëndrojnë të freskëta për muaj të tërë, nëse ruhen në kushtet e duhura. Temperatura, lagështia dhe mungesa e dritës janë ndër faktorët kryesorë që ndikojnë në jetëgjatësinë e tyre.
Mollët preferojnë temperaturat e ulëta, nga -1 deri në 0 gradë Celsius, si dhe lagështinë e lartë. Në kushte shtëpiake, frigoriferi është një zgjidhje praktike për ruajtjen e tyre, ndërsa është e rëndësishme që frutat të jenë të shëndetshme, pa dëmtime dhe shenja kalbjeje.
Disa varietete të vona, si Idared dhe Red Delicious, mund të ruhen deri në pesë muaj në kushte ideale.
Ndërkaq, patatet kërkojnë një ambient të freskët, të errët dhe të ajrosur, me temperaturë nga 6 deri në 10 gradë Celsius. Bodrumet, depot ose korridoret e pa ngrohura mund të jenë vende të përshtatshme për ruajtjen e tyre, për sa kohë që mbrohen nga ngrirja.
Një këshillë e rëndësishme është që patatet të mos lahen para ruajtjes dhe të mos mbahen në enë plastike të mbyllura, pasi lagështia e tepërt mund të përshpejtojë prishjen e tyre.
Edhe pse mund të ruhen në frigorifer, temperaturat shumë të ulëta mund t’ua ndryshojnë shijen dhe ngjyrën gjatë skuqjes. Po ashtu, ekspozimi ndaj dritës mund të shkaktojë gjelbërimin e patateve dhe rritjen e përmbajtjes së glikoalkaloideve, përbërje që në sasi të larta mund të jenë të dëmshme. Patatet që janë kryesisht të gjelbra duhet të hidhen.
Një tjetër gabim që duhet shmangur është ruajtja e mollëve dhe patateve pranë njëra-tjetrës. Mollët çlirojnë etilen, një gaz që mund të përshpejtojë mbirjen e patateve.
Patatet këshillohet të mbahen gjithashtu larg qepëve dhe hudhrave, pasi aromat e tyre mund të ndikojnë në shijen e produkteve të tjera.
Për të zgjatur freskinë e tyre, mollët dhe patatet duhet të ruhen veçmas, në ambiente të përshtatshme, të freskëta dhe të ajrosura. Këto masa të thjeshta ndihmojnë në ngadalësimin e prishjes dhe në pakësimin e ushqimit që përfundon në mbeturina.
Sinjali – aty ku e vërteta flet para lajmit!
Burimi: Sinjali
