Deputetja e Lëvizjes Vetëvendosje, Shqipe Selimi, në seancën e Kuvendit të Kosovës ka kritikuar ministrin e Jashtëm të Serbisë, Marko Gjuriq, për deklaratat e tij në mbledhjen e Organizatës së Kombeve të Bashkuara (OKB), ku foli për të drejtat e njeriut, demokracinë dhe sundimin e ligjit në Kosovë.

Selimi ka thënë se Gjuriq nuk foli për Milan Radoiçiqin, të cilin e cilësoi si organizator të sulmit të armatosur në Banjskë, ku mbeti i vrarë rreshteri i Policisë së Kosovës, Afrim Bunjaku.

“Marko Gjuriq foli për të drejtat e njeriut, demokracinë dhe sundimin e ligjit në Kosovë, por nuk foli për Milan Radoiçiqin, organizatorin e sulmit terrorist në Banjskë, ku u vra rreshteri i Policisë së Kosovës, Afrim Bunjaku”, ka deklaruar Selimi.

Ajo ka ngritur çështjen e qëndrimit të Radoiçiqit në Serbi dhe ka kërkuar përgjegjësi për mosdorëzimin e tij para drejtësisë në Kosovë.

“Nuk foli pse Radoiçiqi vazhdon të jetë i lirë në Serbi, pse nuk i dorëzohet drejtësisë në Kosovë”, është shprehur deputetja.

Sipas saj, në vend që të jepte përgjigje për përgjegjësinë e shtetit serb lidhur me sulmin në Banjskë, Gjuriq zgjodhi të fliste për familjen e presidentit të Serbisë.

Selimi ka kritikuar edhe qëndrimin e përfaqësuesit të Rusisë në të njëjtën mbledhje, duke thënë se ai vazhdoi ta mohonte Republikën e Kosovës.

“Rusia nuk mund të jetë autoritet moral për respektimin e sovranitetit, derisa po vazhdon luftën në Ukrainë”, ka thënë ajo.

Deputetja e Vetëvendosjes ka theksuar gjithashtu se, nëse Serbia kërkon të diskutojë për të drejtat e komuniteteve, atëherë duhet të trajtohet edhe gjendja e shqiptarëve në Luginën e Preshevës.

“Nëse Serbia kërkon të flasë për të drejtat e komuniteteve, atëherë duhet të flasim për shqiptarët në Luginë, për pasivizimin e adresave, mosnjohjen e diplomave dhe problemet e tjera me të cilat përballen ata”, ka deklaruar Selimi. /Telegrafi/