Sassuolo po shqyrton mundësinë e ndryshimeve në repartin e portierëve gjatë afatit kalimtar të janarit, ndërsa në mesin e futbollistëve që mund të largohen nga klubi italian është edhe portieri i Kombëtares së Kosovës, Arijanet Muric.

Sipas mediumit italian Settecalcio, drejtuesit e Sassuolos mund të vendosin për largimin e Muric në muajin janar, nëse ai nuk arrin t’i përmirësojë paraqitjet në vazhdim të sezonit.
Portieri dardan e nisi edicionin si zgjedhja e parë e trajnerit, duke qenë titullar në tetë ndeshjet e para të Serie A. Megjithatë, me kalimin e javëve, ai e humbi vendin në formacion.
Në tetë paraqitjet e tij në kampionat, Muric ka pësuar 17 gola, ndërsa në tri ndeshjet e tjera, në të cilat portën e ka mbrojtur Stefano Turati, Sassuolo ka pranuar edhe 12 gola.
Në total, skuadra italiane ka pësuar 29 gola në 11 ndeshjet e para të kampionatit, duke regjistruar një fillim të vështirë të sezonit. Sassuolo ka grumbulluar vetëm tetë pikë deri më tani.
Megjithatë, as Turati nuk ka arritur të bindë me paraqitjet e tij, ndaj pozita e portierit pritet të jetë një prej çështjeve që klubi do ta shqyrtojë para hapjes së afatit kalimtar dimëror.
Kështu, e ardhmja e Arijanet Muric në Sassuolo mbetet e paqartë, ndërsa paraqitjet e tij në ndeshjet e ardhshme mund të jenë vendimtare për vazhdimin e aventurës në futbollin italian.
Sinjali – aty ku e vërteta flet para lajmit!
Burimi: Sinjali




