Autoritetet rumune thonë se kanë zbuluar një rrjet sabotimi të koordinuar nga Rusia, të cilin e dyshojnë për zjarrin që shpërtheu më 14 shtator në një kompleks industrial pranë një fabrike shtetërore të armëve, në qytetin Brașov, në Rumaninë qendrore.

Shërbimi rumun i Inteligjencës deklaroi të hënën se zjarri ishte pjesë e një fushate më të gjerë operacionesh sabotimi të koordinuara nga Rusia, në kohën kur Moska po vazhdon pushtimin e plotë të Ukrainës.

Sipas agjencisë, objektivat e këtyre operacioneve përfshijnë prodhuesit e armëve dhe objekte të tjera me rëndësi ushtarake e industriale, transmeton Telegrafi.

Këto veprime synojnë të frikësojnë, të dobësojnë kapacitetet mbrojtëse dhe të kufizojnë kontributin e vendeve të shënjestruara në sigurinë evropiane dhe rajonale, thuhet në deklaratën e inteligjencës rumune. Rusia nuk ka reaguar menjëherë ndaj akuzave, ndërsa Moska ka mohuar vazhdimisht pretendime të ngjashme në të kaluarën.

Drejtoria rumune për Hetimin e Krimit të Organizuar dhe Terrorizmit (DIICOT) tha se në zjarrin e Brașovit dyshohet të kenë qenë të përfshirë tre persona: dy shtetas bjellorusë dhe një ukrainas, të cilët jetonin në vende të Bashkimit Evropian. Dy prej tyre u lokalizuan dhe u arrestuan në Gjermani, ndërsa po përgatiteshin të kryenin vepra të ngjashme. Personi i tretë vazhdon të jetë në arrati në Poloni.

Sipas Shërbimit rumun të Inteligjencës, personat që rekrutohen për rrjete të tilla shpesh gjenden përmes rrjeteve sociale. Fillimisht, atyre u ofrohen para për detyra që duken të padëmshme, si vëzhgimi apo fotografimi i objekteve të caktuara. Me kalimin e kohës, detyrat bëhen më serioze dhe mund të përfshijnë vandalizëm, zjarrvënie apo edhe vrasje, paralajmëroi agjencia.

Rumania, anëtare e NATO-s dhe Bashkimit Evropian, ndan me Ukrainën një kufi prej më shumë se 600 kilometrash. Presidenti rumun, Nicușor Dan, ka deklaruar se vendi i tij është objektiv i një lufte hibride që, sipas tij, Rusia po zhvillon për të destabilizuar shtetet që mbështesin Kievin. Ai ka përmendur shkeljet e hapësirës ajrore rumune nga dronët, sulmet kibernetike, fushatat e dezinformimit dhe aktet e sabotimit.

Edhe ministri i Jashtëm, Dan Neculaescu, e cilësoi zjarrin në Brașov si pjesë të një fushate më të gjerë sabotimi në Evropë, që synon prodhimin ushtarak. “Sulmet hibride nuk do të na pengojnë të forcojmë qëndrueshmërinë dhe aftësitë tona mbrojtëse”, shkroi ai në rrjetin social X.

Akuzat e fundit vijnë pas një serie incidentesh në objektet e mbrojtjes në disa vende evropiane. Në shtator, shpërthime dhe një zjarr u raportuan në një depo municionesh në Bullgari, disa javë pas një zjarri në një tjetër objekt të këtij lloji në vend. Të dyja objektet operohen nga prodhuesi bullgar i armëve EMCO, municionet e të cilit përdoren në Ukrainë.

Po në shtator, mjete ndezëse u hodhën pranë zyrave të një kompanie të mbrojtjes në Mynih. Ndërkohë, autoritetet rumune njoftuan se kishin ndaluar një shtetas rus, i dyshuar për filmimin dhe fotografimin e objekteve ushtarake në kuadër të përgatitjeve për sabotim. Në gusht, një shpërthim goditi një fabrikë municionesh pranë Romës, në Itali, e operuar nga kompania e armëve KNDS.

Edhe në det janë raportuar incidente të rënda. Të paktën tetë anije mallrash janë goditur pranë brigjeve të Rumanisë dhe Bullgarisë gjatë tri javëve të fundit, ndërsa rreth 34 marinarë janë raportuar të vdekur ose të zhdukur. Presidenti Dan i ka cilësuar sulmet ndaj anijeve në ujërat rumune si një tjetër shembull të pasojave tragjike të agresionit rus kundër Ukrainës.

Një vit më parë, Polonia dhe Rumania arrestuan gjithashtu tetë persona të dyshuar për përfshirje në një komplot rus që synonte dërgimin e pakove me eksploziv drejt Ukrainës. /Telegrafi/