Eksportet zvicerane kanë shënuar rritje gjatë tremujorit të tretë të vitit 2026, duke arritur në rreth 75 miliardë franga, pavarësisht rënies së dërgesave drejt Shteteve të Bashkuara.

Sipas të dhënave të publikuara nga autoritetet doganore zvicerane, eksportet u rritën me 2,6% krahasuar me tremujorin paraprak, duke konfirmuar rimëkëmbjen e tregtisë së jashtme të vendit.

Ndërkohë, importet u rritën me 1,8%, duke arritur në një rekord prej 61 miliardë frangash. Si rezultat, suficiti tregtar i Zvicrës arriti në 14 miliardë franga, krahasuar me 13,2 miliardë në tremujorin e dytë.

Rritja e eksporteve u mbështet kryesisht nga tregjet evropiane, ku dërgesat zvicerane u rritën me 8%. Në të kundërt, eksportet drejt Shteteve të Bashkuara ranë me 13,5%, pas rritjes së fortë prej 29,8% në tremujorin paraprak, shkruan Le Temps, transmeton Telegrafi.

Në tregjet aziatike u shënua një rritje më e lehtë prej 0,8%, ndërsa eksportet drejt Kinës u rritën me 4%.

Sektori kimik dhe farmaceutik vazhdoi të mbetet një nga shtyllat kryesore të eksporteve zvicerane. Gjatë tremujorit të tretë, eksportet e këtij sektori u rritën me 1,6%, pas një rritjeje prej 15,7% në tremujorin paraprak.

Rritje u regjistrua edhe në sektorin e makinerive, pajisjeve elektrike dhe elektronikës, me 3,1%, duke vazhduar trendin pozitiv të muajve të mëparshëm.

Vetëm gjatë muajit shtator, eksportet zvicerane u rritën me 1,5%, duke arritur në 23,2 miliardë franga.

Të dhënat tregojnë se tregtia e jashtme e Zvicrës po vazhdon rimëkëmbjen, megjithëse zhvillimet ndryshojnë nga një treg në tjetrin. Rritja e kërkesës nga Evropa ka ndihmuar në kompensimin e rënies së eksporteve drejt tregut amerikan./Telegrafi/