Këngëtarja shqiptare Ronela Hajati ka nxitur dyshimet se mund të jetë në një lidhje dashurie, pas disa përgjigjeve të dhëna gjatë një loje në emisionin “Live me Luizin”, të prezantuar nga Luiz Ejlli.
E ftuar në emision, artistja mori pjesë në një lojë me pyetje të shpejta, ku duhej të vlerësonte me nota sjelljet e meshkujve në situata të ndryshme në një lidhje.
Vëmendjen më të madhe e mori përgjigjja e saj kur Luizi e pyeti se si do të reagonte nëse një djalë, të cilin e vlerëson me notën 10, do t’i dërgonte mesazhin “mirëmëngjesi princeshë” në orën 14:00.
“Me 2 të drekës sime i bie 8 e darkës atje”, u përgjigj Ronela, duke lënë të kuptohet se personi në fjalë mund të ndodhet në një zonë me diferencë të konsiderueshme kohore nga Shqipëria.
Reagimi i Luizit, i cili përmendi Kanadanë dhe Shtetet e Bashkuara të Amerikës si destinacione të mundshme, e shtoi edhe më shumë kureshtjen për jetën private të këngëtares.
Megjithatë, Ronela nuk zbuloi identitetin e personit dhe as nuk konfirmoi se është në një lidhje dashurie, duke lënë të hapura dyshimet për një romancë të mundshme në distancë.
Gjatë lojës, këngëtarja foli edhe për qëndrimin e saj ndaj sjelljeve të ndryshme në çift. Ajo u shpreh se do ta vlerësonte më shumë një partner që e komplimenton kur publikon fotografi provokuese, duke e konsideruar këtë shenjë të vetëbesimit të tij.
Ndërkaq, për situatën kur partneri e heq nga Instagrami ose e bllokon në WhatsApp pas një zënke, Ronela reagoi me humor, duke thënë se në një rast të tillë do t’ia ulte vlerësimin.
Artistja tregoi gjithashtu se nuk do ta kishte problem ta paguante faturën në restorant nëse partneri do ta harronte portofolin, ndërsa tha se gjestet romantike, si dhurimi i luleve pa ndonjë arsye të veçantë, do t’ia rrisnin vlerësimin.
Megjithatë, ishte përgjigjja e saj për mesazhin e mëngjesit dhe diferencën kohore ajo që nxiti më së shumti spekulime për jetën e saj sentimentale.
Sinjali – aty ku e vërteta flet para lajmit!
Burimi: Sinjali
