Një grup i madh qytetarësh u mblodh mbrëmjen e sotme para zyrave të tabloidit pro-qeveritar *Informer* në Beograd, ndërsa disa prej tyre më pas hynë brenda në ndërtesë.

Gjatë një transmetimi të drejtpërdrejtë, kryeredaktori i *Informer*, Dragan J. Vuçiqeviq, e përshkroi situatën si një “krizë pengmarrjeje” dhe i bëri thirrje policisë të ndërhyjë menjëherë, transmeton Telegrafi.

“Ata do të vrasin dikë; në ndërtesë ka edhe fëmijë,” pretendoi Vuçiqeviq, duke thënë se ishte vetëm çështje kohe para se grupi të hynte me forcë në ambiente dhe të sulmonte stafin. Ai gjithashtu pretendoi se personat jashtë ndërtesës ishin në gjendje të dehur.

Gjatë transmetimit, Vuçiqeviq i bëri thirrje publikisht Ilija Srdanoviçit – kandidatit kryesor të “Listës Studentore” fituese – që të ndërhynte dhe të ndalonte turmën. Ai gjithashtu u përpoq të telefononte policinë, por raportoi se askush nuk u përgjigj.

Në një moment, ai i kërkoi një kolegu të telefononte ambulancën, duke deklaruar se Nina Kuburoviç po kalonte një krizë epileptike. Pak më vonë, disa nga qytetarët e mbledhur hynë në zyrat e *Informer*.

“Kurrë nuk ju kam quajtur ustashë”, u tha Vuçiqeviq qytetarëve. Deri më tani, nuk ka asnjë informacion zyrtar nga policia lidhur me ndonjë incident, lëndim apo arrestim gjatë tubimit të kësaj mbrëmjeje.

Më herët gjatë ditës, *Informer* raportoi se Vuçiqeviq ishte përballur me një valë telefonatash dhe kërcënimesh, pasi numrat e tij privatë të telefonit ishin shpërndarë në rrjetet sociale.

Këtë mëngjes, vetë Vuçiqeviq pretendoi se disa persona kishin shkuar te shtëpia e tij gjatë natës, duke rënë zilen dhe duke bërtitur, gjë që kishte zgjuar fëmijët e tij.

Milomir Jaçimoviq u shfaq gjithashtu sot para zyrave të *Informer*, duke mbërritur me autobusin e tij.

*Informer* e akuzoi atë se kishte ardhur për të bllokuar redaksinë, ndërsa Jaçimoviq u tha gazetarëve se po “ofron dorën e pajtimit për të gjithë” dhe se nuk kishte ndonjë agjendë politike personale.

Kjo nuk është hera e parë që Vuçiqeviq e përshkruan një protestë jashtë zyrave të *Informer*-it si një “krizë pengmarrjeje”.

Ai veproi në të njëjtën mënyrë në mars të vitit 2025, kur disa mijëra studentë dhe qytetarë u mblodhën para ndërtesës për të protestuar kundër mënyrës se si *Informer*-i pasqyroi demonstratat studentore.

Në atë kohë, studentët theksuan se nuk po e bllokonin ndërtesën dhe nuk po i pengonin punonjësit të hynin apo të dilnin, ndërsa Vuçiqeviq pretendoi se redaksia po mbahej “peng” nga protestuesit. Burime të pavarura gazetareske më vonë e hodhën poshtë këtë pretendim.

Prej vitesh, *Informer*-i ka qenë një nga aleatët mediatikë më të zëshëm të Aleksandar Vuçiqit dhe administratës së tij. Gjatë fushatës zgjedhore të këtij viti, ai vuri në shënjestër në veçanti “Listën Studentore” (*Studentska lista*) dhe kandidatin e saj kryesor, Ilija Srdanoviq.

Në fillim të tetorit, portali *Raskrikavanje* zbuloi se *Informer*-i kishte publikuar një ekstrakt të falsifikuar nga regjistri kadastral kroat, duke i atribuar gabimisht Srdanoviqit një shtëpi në Kroaci.

Në transmetimet e tij, Vuçiqeviq e quajti Srdanoviqin “mjeran”, “llum” dhe “njeri të poshtër”, si dhe ngriti një sërë akuzash të tjera kundër tij gjatë gjithë fushatës.

Pas fitores së “Listës Studentore” dje dhe pranimit të humbjes nga ana e Vuçiqit, *Informer*-i vazhdoi me një pasqyrim tejet negativ ndaj fituesve të zgjedhjeve, duke përdorur terma si “bllokues” dhe “ekstremistë”. /Telegrafi/